Քվեարկել եմ հանուն ազատ, երջանիկ և հզոր Հայաստանի. Փաշինյան

ՀՀ վարչապետի պաշտոնակատար Նիկոլ Փաշինյանը, տիկնոջ և աղջիկների ուղեկցությամբ, քաղաքացիական իր պարտքը կատարելու էր եկել Երևանի թիվ 133 մանկապարտեզում տեղակայված 8/16 ընտրատեղամաս: «Քվեարկել եմ  հանուն ազատ, երջանիկ և հզոր Հայաստանի»,- քվեարկությունից հետո լրագրողներին ասաց նա:

Հարցին, թե ի՞նչ գնահատական կտա ընտրությունների ընթացքին, Փաշինյանն արձագանքեց՝ բայց հարցեր կա՞ն:

Դիտարկմանը, թե ՀՀԿ ցուցակը գլխավորող  Վիգեն Սարգսյանը հայտարարել է, որ կիրառվել է վարչական ռեսուրս, վարչապետի պաշտոնակատարը պատասխանեց. «Ե՞րբ է կիրառվել, որտե՞ղ: Եթե վարչական ռեսուրսի կիրառման փաստեր պարզվեն, ապա ռեսուրս կիրառողները կպատժվեն»:

Ռուս լրագրողի հարցին՝ տեսակետներ կան, թե ձեր բացարձակ հաղթանակը, որին սպասում են Հայաստանի բնակիչները,  վտանգ է Հայաստանի ժողովրդավարությանը, Փաշինյանը պատասխանեց. «Դուք արդեն պատասխանեցիք, քանի որ ասացիք՝ բացարձակ հաղթանակը, որին սպասում են ՀՀ քաղաքացիները: Հենց սա է ժողովրդավարության էությունը, երբ հենց ընտրողներն են որոշում՝ ով պիտի լինի իշխանության ղեկին, ով՝ խորհրդարանում, և ով չպետք է լինի խորհրդարանում»:

Ըստ  վարչապետի պաշտոնակատարի՝  եթե հարցումներն արտահայտում են ժողովրդի կամքը, ուրեմն կոալիցիա չի լինի:

Փաշինյանը հարկ համարեց ընդգծել, որ  օրենքը չի արգելում մարզպետին` լինել պատգամավորի  թեկնածու, որ իրենց մարզպետերը քարոզչություն են իրականացրել օրենքով սահմանված կարգով:

ՀՀ վարչապետի պաշտոնակատարը խոստացավ՝ առաջիկա հինգ տարում արմատախիլ է անելու ծայրահեղ աղքատությունը, իսկ ներդրողները գալիս են և կգան: