Հայաստանը մշակութային կապեր կհաստատի ոչ միայն Մադագասկարի, այլ նաև Տոգոյի հետ

Կառավարության վաղվա նիստի օրակարգում ընդգրկված է մի որոշում` համաձայնություն տալ «Հայաստանի Հանրապետության Կառավարության և Տոգոյի Հանրապետության Կառավարության միջև մշակութային համագործակցության մասին» համաձայնագրի կնքման առաջարկությանը:

Ըստ այդ համաձայնագրի` կողմերը կխրախուսեն մշակութային փոխանակումները երկու պետությունների միջև` այսպիսով աջակցելով և դյուրացնելով երկկողմ մշակութային համագործակցությունը տարբեր ոլորտներում`

ա) ցուցահանդեսային փոխանակումները,

բ) նկարիչների, գրողների, բանաստեղծների, երաժիշտների և մասնագետների փոխանակումը,

գ) մշակութային միջոցառումների  փոխանակումը (պար, երաժշտություն, թատրոն, մնջախաղ և այլն),

դ) ֆիլմերի և վավերագրական ֆիլմերի փոխանակումները,

ե) գրքերի, ամսագրերի  և այլ հրատարակությունների տարածումը,

զ) արվեստի և մշակույթի ոլորտի ստեղծագործողների, մասնագետների և արհեստավարժների միջև փորձի փոխանակումը,

է) մասնակցությունը մյուս երկրում կազմակերպվող  միջազգային կինոփառատոներին և այլ մշակութային միջոցառումներին, ինչպիսիք են` Գրքի տոնավաճառը կամ մշակութային փառատոները

ը) մասնակցությունը Ֆրանկոֆոնիայի շարժմանը, որոնք անցկացվում են յուրաքանչյուր երկրում` մասնավորապես ֆրանկոֆոնիայի միջազգային օրվա տոնակատարությունների շրջանակներում:

Սույն համաձայնագիրը կնքվում է հինգ տարի ժամկետով, գործողության ժամկետը ինքնաբերաբար կարող է երկարաձգվել: