ԵՄ-ն ավելի սերտ կապեր կհաստատի տարածաշրջանի երկրների հետ

«Մեդիամաքս» լրատվական գործակալության հետ հարցազրույցում Ֆրանսիայի նախագահ Նիկոլա Սարկոզին ասել է, որ Ֆրանսիան ցանկանում է, որ Եվրամիությունն ավելի սերտ կապեր հաստատի տարածաշրջանի երկրների հետ` սկսած Հայաստանից:

«Եվրամիության համար Կովկասը ռազմավարական տարածաշրջան է, եւ Եվրամիության հետ ասոցացման եւ գործընկերության կապերը կօժանդակեն բարեկեցությանը, ժողովրդավարության ամրապնդմանը եւ երկխոսությանը կովկասյան երեք երկրներում»,- ասել է Սարկոզին եւ հավելել, որ վերջին տարիներին Եվրամիությունն ուժեղացրել է իր դերակատարությունը Հարավային Կովկասում, եւ դա իրեն ուրախացնում է:

Ֆրանսիայի նախագահը նաեւ հիշեցրել է, որ ԵՄ-ն դա արել է նախ` Եվրոպական հարեւանության քաղաքականության միջոցով, այնուհետեւ` Արեւելյան գործընկերության շրջանակներում, որին Ֆրանսիան սատարել էր ամենասկզբից` 2009-ից: