70 տարեկան դարձա, նախագահը կարող էր, չէ՞, շնորհավորել. Ծատուրյան

Այսօր ՀՀ ժողովրդական արտիստ, թատերագետ Նիկոլայ Ծատուրյանը լրագրողների հետ զրուցեց վերջին օրերին աղմուկ հանած թեմայի` կոչումներ շնորհելու մասին: Մասնավորապես` հանրությունը ընդդիմացավ ամերիկաբնակ երգիչ Արմենչիկին տրված վաստակավոր կոչմանը:

Ծատուրյանը նախ ցավով նշեց, որ Արմենչիկի կոչման շուրջ աղմուկը ստվերում էր թողել մնացած այն վաստակավորներին, որոնք ստացել էին կոչումներ նախագահի հրամանագրով, և նրանց ոչ ոք չի էլ շնորհավորում:

«Է, թող ստանա Արմենչիկը, ինձ դա չի մտահոգում: Ինձ մտահոգում է, որ մենք լրիվ կորցրել ենք չափանիշները: Այս տարի ինձ չհրավիրեցին Հայաստանի անկախության տոնին, չգիտեմ` ինչու, երևի իրենք կիմանան, թե ինչու չհրավիրեցին»,- ասաց Նիկոլայ Ծատուրյանը:

Նա նաև հավելեց, որ արվեստագետը, առհասարակ, պետք է իր տեղն ունենա հասարակության մեջ, ոչ թե` էսինչը իշխանությունների հետ լավ է, նա կոչում է ստանում, իսկ ով քննադատում է իշխանություններին, նա չի ստանում: Ով որ մի քիչ համարձակ է խոսում, նրան անտեսում են:

Լրագրողները հարցրեցին` իսկ եթե Ձեզնից վերցնե՞ն Ձեր կոչումը համարձակ խոսելու համար, Ծատուրյանը պատասխանեց. «Վերցնում են, թող վերցնեն: Ես 70 տարեկան դարձա, նախագահը կարող էր, չէ՞,  շնորհավորել: Իմ շնորհավորանքների մեջ այսպիսի շնորհավորանք կար. «Շնորհավորում ենք, որ նախագահը Ձեզ չի շնորհավորել»»,- ասաց Նիկոլայ Ծատուրյանը:

Թատերագետը կոչ է անում բոլորին` կոչումների հետ կապված տարաձայնություններին ու թյուրիմացություններին վերջ տալու համար բոլորը հավաքվեն ու ստացած կոչումները ետ հանձնեն, որպեսզի իշխանությունները հասկանան, որ իրենք չեն որոշողը` ով վաստակ ունի, ով` ոչ: