Գործարարների համար լրացուցիչ բեռ, ծանրություն, խոչընդոտ չպետք է ստեղծել. Հովիկ Աբրահամյանի հրահանգը` նախարարներին

Այսօր կառավարության նիստում տրանսպորտի և կապի փոխնախարար Արթուր Առաքելյանը ներկայացրեց որոշման նախագիծ, որով հստակեցվում են առավել վտանգավոր գոտիներում օբյեկտների տեղակայման և քաղաքացիների գտնվելու կանոնները, այդ գոտիներում աշխատանքների իրականացումը, երկաթուղային գծերով երթևեկության և երկաթուղային գծերի անցման կանոնները:

Հովիկ Աբրահամյանը հարցրեց, թե ի՞նչ խստացումների մասին է խոսքը, և արդյո՞ք դա խնդիրներ չի ստեղծի շրջապատում գործունեություն ծավալող գործարարների համար:

Հարցին պատասխանեց կառավարության աշխատակազմի ղեկավար-նախարար Դավիթ Հարությունյանը` ասելով, որ եթե անվտանգության գոտուց դուրս է, ապա ոչ մի խնդիր չի ստեղծվի գործարարների համար:

Հովիկ Աբրահամյանը հարցրեց. «Ի՞նչն է պատճառը, որ մինչև հիմա չի խստացվել, հիմա է խստացվում»:

Դավիթ Հարությունյանը պատասխանեց, որ խստացումների պատճառը վթարների դեպքերն են:

«Ընդհանրապես, ուշադիր պետք է լինենք, որ որևէ լրացուցիչ բեռ, ծանրություն ու խոչընդոտ չստեղծենք գործարարների համար: Դա հիմք ընդունեք, դա բոլորին է վերաբերում: Այսօր, այս տնտեսական պայմաններում հարկավոր է հակառակը` բեռը մի քիչ թեթևացնել, հնարավորությունները մեծացնել ու դյուրացնել  իրավիճակը բիզնես աշխարհի համար: Հիմա բերել, խստացնում եք, ի՞նչն է պատճառը: Տպավորություն է, որ ամեն գերատեսչություն ցանկանում է իր ներկայությունը ևս մեկ անգամ հաստատել»,- ասաց վարչապետը` հավելելով, որ մինչև մանրամասն իրեն չզեկուցեն, ինքն այդ որոշումը չի ստորագրելու: