Հիմք է դրվում Սահմանադրության մեկնաբանման ինստիտուտին, որը մինչ այս չի եղել. Արծվիկ Մինասյան

Այսօր սահմանադրական փոփոխությունների նախագծի վերաբերյալ ԱԺ լսումներում ԱԺ ՀՅԴ խմբակցության պատգամավոր Արծվիկ Մինասյանը ելույթ ունեցավ` նախ` շնորհակալություն հայտնելով սահմանադրական փոփոխությունների մասնագիտական հանձնաժողովին կատարած քրտնաջան աշխատանքի համար: Ըստ նրա` այսօր այդ աշխատանքն արդեն ներկայացվում է առարկայական քննարկման: Պատգամավորը կոչ արեց բոլորին` ներկայացնել առարկայական առաջարկներ, որպեսզի գտնվեն երկրի առջև ծառացած մարտահրավերների լուծման բանալիները:

«Առաջիկայում սպասվում է քննարկում սահմանադրական փոփոխությունների մասին: Հանրությունից պետք է ստանանք ազդակներ, ուստի ճիշտ կլինի, որ հանրությանը ճիշտ ներկայացվեն սահմանադրական փոփոխությունները: Բայց առանձին ելույթներում պարզապես 25 տարվա պրոբլեմները ներկայացվում են, որ դրանք Սահմանադրության հետ կապ չունեն, այլ մարդու հետ կապ ունեն: Այդ ելույթներում ավելորդ անգամ շեշտադրվում են բաներ, որոնք չկան միջազգային փորձում: Դա ճիշտ չէ, և պետք չէ խեղաթյուրել ամեն ինչ»,- ասաց Արծվիկ Մինասյանը:

Ըստ նրա` հիմք է դրվում Սահմանադրության մեկնաբանման ինստիտուտին, որը մինչ այս չի եղել: Բացի այդ` ներմուծվում է սահմանադրական օրենքի ինստիտուտը, որը էական կարգավորումների համակարգ է:

Պատգամավորը կարևորեց հասարակական կազմակերպությունների կողմից առաջարկները:

 «Եթե մենք շատ ավելի մասնագիտական քննարկումներ ծավալենք, ապա նրանք, ովքեր առարկայորեն են դեմ, անպայման կողմ կլինեն այս փոփոխություններին: Կոչ եմ անում՝ միասին կարողանանք այս փոփոխություններն արժևորել, բարեփոխման առաջարկներ ներկայացնել ու հարգանքով վերաբերվել պետական ինստիտուտներին»,- ասաց նա: