Աշխատանքից հեռացված գինեկոլոգն ասելիք չունի

Վայքի հիվանդանոցի մանկաբարձական-գինեկոլոգիական բաժանմունքի վարիչ, գինեկոլոգ Մետաքսյա Հովհաննիսյանը ազատվել է աշխատանքից բժշկական էթիկայի ու նորմերի կոպիտ խախտման պատճառով:

Առողջապահության նախարարի մամուլի քարտուղար Շուշան Հունանյանը Yerkir.am-ի հետ զրույցում նշեց, որ օգոստոսի 11-ի դեպքից հետո, երբ նորածին երեխան մահացել էր, հարազատների պնդմամբ` բժշկուհի Մետաքսյա Հովհաննիսյանի մեղքով, նախարարության կողմից  մասնագիտական հանձնաժողով էր կազմվել եւ այն համապատասխան ուսումնասիրություններ էր կատարել տվյալ հիվանդանոցում:

Դրանց արդյունքում կազմվել էր եզրակացություն, որը, սակայն, հրապարակել չէին կարող, քանի որ դեպքի առթիվ հարուցվել էր քրեական գործ եւ եզրակացության հրապարակումը կարող է ազդեցություն ունենալ քննության վրա: Սակայն նշվել է, որ կան որոշակի բացթողումներ, թերացումներ:

Սակայն սեպտեմբերի 15-ին առողջապահության նախարարը նամակով առաջարկել է Վայոց ձորի մարզպետին` զբաղեցրած պաշտոններից ազատել մարզպետարանի առողջապահության եւ սոցիալական ապահովության վարչության առողջապահության բաժնի պետին, բուժկենտրոնի տնօրենին, նաեւ դադարեցնել Մետաքսյա Հովհաննիսյանի գործունեությունը:

Շ. Հունանյանն ընդգծեց, որ նախարարը ոչ ոքի չի հեռացրել աշխատանքից, քանի որ նման որոշումներն ընդունում են մարզային հաստատություններում:

Այս որոշման վերաբերյալ փորձեցինք լսել նաեւ բժշկի` Մետաքսյա Հովհաննիսյանի տեսակետը, սակայն վերջինս միայն պատասխանեց. «Ես ոչինչ չունեմ ասելու»: