Թուրքերը դաժանաբար կացնահար են արել հայ դեղագործին

Դեղագործ, գրող, հասարակական և քաղաքական գործիչ:

Ծնվել է 1879/80 թ., Խարբերդի նահանգի Մելիտինեի գավառի կենտրոն Մելիտինե քաղաքում:

Բժիշկ Միքայել Քեշիշյանի եղբայրն է:

Կրթությունն ստացել է ամերիկացի միսիոներների Խարբերդի Եփրատ քոլեջում:

1900-1902 թթ. ուսանել է Բեյրութի Ամերիկյան համալսարանում և դեղագործի կոչում ստացել:

Վերադառնալով Մելիտինե, եղբոր՝ Միքայելի նյութական աջակցությամբ բացել է սեփական դեղատուն և դեղագործ աշխատել:

Եղել է ՀՅԴ գործիչ, գրող:

1915 թ. թուրքերը իմանալով բժիշկ եղբոր՝ Միքայելի, օսմանյան բանակից փախուստի ու զորավար Անդրանիկի բանակին միանալու մասին, անմիջապես ձերբակալել են Խոսրովին: Թշնամու ձեռքով չսպանվելու համար, Խոսրովը Մելիտինեի բանտում թույն է խմել: Սակայն թուրք դահիճները նրան շտապ դեղաթափ են արել, և ի պատիժ այդ հանդգնության, դաժանաբար կացնահար արել 1915 թ. հունիսի 15-ին՝ 36 տարեկանում:

Մինասյան Հ., Օսմանյան կայսրությունում, Թուրքիայի Հանրապետությունում և հարակից տարածքներում բռնաճնշումների և ցեղասպանության ենթարկված հայ բժիշկներ: Համառոտ կենսագրական բառարան, Երևան, 2014, 519 էջ, էջ 375–376: