Որդին դաժանաբար սպանել է հորը /տեսանյութ/

Քիչ առաջ ոստիկանության Լոռու մարզային վարչության և Վանաձորի ոստիկանության բաժնի աշխատակիցների ուղեկցությամբ` Վանաձորի Տիգրան Մեծի 9 շենքի 1-ին բնակարան փորձաքննության էին բերվել նախօրեին դաժանաբար հորը սպանած  երիտասարդին:

Ինչպես հաղորդում է ֆոտոլրագրող Գագիկ Շամշյանը, երեկ երեկոյան` ժամը 18:30-ին, հիվանդանոցից ոստիկանության Վանաձորի բաժին հաղորդում է ստացվել, որ Վանաձոր քաղաքի Տիգրան Մեծի պողոտայի 9 շենքի բնակարաններից մեկում մահացած տղամարդ կա:

Դեպքի վայր մեկնած օպերատիվ խումբը վերոհիշյալ բնակարանում հայտնաբերել է 60-ամյա Սերյոժա Ղուբաթյանի դիակը`  գլխին հասցված բազմաթիվ վնասվածքներով:

Ձեռնարկված օպերատիվ-հետախուզական և քննչական միջոցառումների շնորհիվ պարզվել է, որ Ս. Ղուբաթյանին նույն օրը բնակարանում, դանակով և կացնով հարվածներ հասցնելով, սպանել է որդին՝ 21-ամյա Տիգրան Գյուլբանկյանը, ով  2002 թվականի սեպտեմբերի 26-ից  հաշվառված է Լոռու մարզի հոգենյարդաբանական դիսպանսերում` նեւրասթենիա` ախտորոշմամբ:

Երեկ ավագ քննիչը դիմել էր Լոռու մարզի ընդհանուր իրավասության դատարան, որպեսզի Տիգրան Գյուլբանկյանի նկատմամբ կատարվի հոգեբուժական փորձաքննություն: Դատավոր Նարինե Հովակիմյանը բավարարել է պահանջը և, ըստ Գագիկ Շամշյանի, Տիգրան Գյուլբանկյանին տեղափոխելու են Նուբարաշենի հոգեբուժական հիվանդանոց:

Հարուցվել է քրեական գործ 104-րդ հոդվածի 1-ին մասով, այն է` ապօրինաբար, դիտավորությամբ մեկ ուրիշին կյանքից զրկելը:  Հանցագործության գործիքները` կացինն ու դանակը, առգրավված են: Կատարվում է նախաքննություն:

Տեսանյութը` Գագիկ Շամշյանի