Զինվորին դաժանաբար ծեծել են

Այսօր Հայաստանի պաշտպանության նախարար Սեյրան Օհանյանը, Ազգային ժողովում  անդրադառնալով  երկու օր առաջ  ԼՂ զորամասերից մեկում զինվորի մահվան դեպքին,  ասել է.  «Դեպքը տեղի է ունեցել միջանձնային հարաբերությունների խախման արդյունքում: Վիճաբանության, այնուհետև ծեծկռտուքի արդյունքում է տեղի ունեցել այդ մահը, որը նաև դիահերձումն է ապացուցել: Հարուցված է քրեական գործ, և միանգամից բացահայտվել են այն երեք անձինք, որոնք կատարել են հանցագործությունը»:

Պաշտպանության նախարարը խոստացել է, որ մեղավորները կպատժվեն:

Նա նշել է, որ բանակում տեղի ունեցած յուրաքանչյուր արտակարգ պատահարի ժամանակ իրենք նշանակում են հրամանատարական, ծառայողական քննություններ, բացի դրանից` իրավապահ մարմիններն անմիջապես սկսում են իրենց գործողությունները:

«Չի եղել որևէ դեպք, չի եղել որևէ պատահար, որին մենք չարձագանքենք և համապատասխան որոշումներ չընդունենք` սկսած բացահայտումով և վերջացրած նաև պատժի ու տույժերի կիրառմամբ, և այդ ամենը փորձում ենք ներկայացնել հանրությանը: Չպետք է թերհավատ լինեք. պաշտպանության նախարարը և նրա ամբողջ համակարգն ամբողջությամբ բաց է լինելու ժողովրդի առջև»,- ասել է Սեյրան Օհանյանը: