Տավուշի մարզի միջհամայնքային և համայնքային ճանապարհային ցանցը կբարելավվի

Այսօր կառավարության նիստում ֆինանսների նախարար Գագիկ Խաչատրյանը ներկայացրեց որոշման նախագիծ` «2015թ. պետական բյուջեում վերաբաշխում, լրացում կատարելու և Տավուշի մարզպետարանին գումար հատկացնելու մասին»:

Որոշման անհրաժեշտությունը պայմանավորված է նրանով, որ  Տավուշի մարզի բազմաթիվ միջհամայնքային և համայնքային ճանապարհները գտնվում են անմխիթար վիճակում, ինչը բարդացնում է տեղափոխությունը թե´ համայնքից համայնք, թե´ համայնքների ներսում, թե´ դեպի տուրիստական գոտիներ: Միևնույն ժամանակ, ՀՀ պետական բյուջեում առաջացել են խնայողություններ՝ Ցեղասպանության 100-րդ տարելիցի միջոցառումների կազմակերպման ծրագրով: Սույն որոշման նախագծով առաջարկվում է խնայված միջոցների մի մասն ուղղել ՀՀ Տավուշի մարզի` դեպի տուրիստական կենտրոններ տանող ճանապարհների հիմնանորոգմանը:

Որոշման իրականացումը ենթադրում է ՀՀ Տավուշի մարզի ճանապարհային ցանցի բարելավում և անվտանգ երթևեկության ապահովում, զբոսաշրջության բնագավառի զարգացմանը նպաստող ենթակառուցվածքների ստեղծում: