Սփյուռքի երեխաները, «բարև» բառից բացի, այլ հայերեն բառ չգիտեն. Նաիրա Զոհրաբյան

Այսօր ԱԺ-ում քննարկվում էր 2014թ. բյուջեի կատարողականը կրթության, Սփյուռքի նախարարության ոլորտներում:

ՀԱԿ պատգամավոր Արամ Մանուկյանը հարց ուղղեց հիմնական զեկուցող` գլխավոր գանձապետ Ատոմ Ջանջուղազյանին, թե որքանո՞վ է նվազել աշակերտների թիվը հանրապետությունում, և եթե աշակերտների թիվը պակասում է, որքանո՞վ են հատկացումները, համապատասխանաբար, նվազում:

Ատոմ Ջանջուղազյանը նշեց, որ տեղեկատվություն չունի աշակերտների թվի վերաբերյալ, ապա հավելեց, որ հատկացումները տրվում են աշակերտների թվին համապատասխան, և եթե աշակերտների թիվը նվազում է, հատկացումներն էլ են նվազում:

Սփյուռքի նախարար Հրանուշ Հակոբյանին էլ հարց ուղղեց ԲՀԿ խմբակցության ղեկավար Նաիրա Զոհրաբյանը: Նա նշեց, որ Սփյուռքի հայ երեխաների ուծացում է գնում, առավելագույնը, որ նրանք գիտեն,«բարև» բառն է: «Ո՞նց ենք փորձելու կարգավորել, որ կարողանանք Սփյուռքի կարևոր համայնքներում հային հայ պահել»,- հարցրեց պատգամավորը:

Հրանուշ Հակոբյանը նշեց, որ կիսում է պատգամավորի մտահոգությունը, որ դա ամենաբարդ խնդիրն է Սփյուռքում: «Իրոք, գնալով պակասում է հայերեն խոսող մարդկանց թիվը, Սփյուռքի հայկական դպրոցների աշակերտների թիվը: Շատ ծնողներ մտածում են, որ հեռավոր տարածքներում հայերենը այդքան էլ պետք չէ, որ պետք է իրենց երեխաներին արագ ինտեգրեն օտար լեզուների մեջ: Մյուս պատճառներից մեկն էլ խառնամուսնություններն են»,- ասաց նախարարը՝ հավելելով, որ դրա համար իրականացվում են բազմաթիվ կրթական ծրագրեր, խրախուսական ծրագրեր, մասնավորապես` ՀԲԸՄ-ի հետ ստեղծվել է վիրտուալ քոլեջ, որ դասապրոցես է իրականացնում համացանցի միջոցով: Նախարարը նշեց, որ իրականացվող ծրագրերը բավարար են, մնում է ցանկություն՝ մասնակցելու այդ ծրագրերին և սովորելու հայերեն: