Ի՞նչ պատիժ է սպառնում ԵՊՀ-ում ահաբեկչության մասին կեղծ հաղորդում տված ուսանողներին

Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում մեղադրող դատախազ Արթուր Մանուկյանը հրապարակեց ԵՊՀ-ում ահաբեկչության մասին կեղծ հաղորդում տալու գործով մեղադրական ճառը: Նա միջնորդեց երկու ամբաստանյալներին՝ Երևանի պետական համալսարանի` արդեն նախկին ուսանող Արամ Հայրյանին և մանկավարժական համալսարանի ուսանողուհի Սուսաննա Մնացականյանին մեղավոր ճանաչել և նշանակել պատիժ՝ տուգանքի տեսքով: Մասնավորապես` Արամին տուգանել նվազագույն աշխատավարձի 350-ապատիկի չափով (350 հազար դրամ), իսկ Սուսաննային՝ 250-ապատիկի (250 հազար դրամ) չափով:

Հիշեցնենք, որ, ձեռք բերված ապացույցների համակցությամբ, Ա. Հայրյանին մեղադրանք է առաջադրվել ՀՀ քրեական օրենսգրքի 259-րդ հոդվածի, 38-259-րդ հոդվածի հատկանիշներով (2 դրվագ), իսկ Ս. Մնացականյանին՝ ՀՀ քրեական օրենսգրքի 259-րդ հոդվածի հատկանիշներով (2 դրվագ): Դատաքննության ընթացքում երկու ամբաստանյալներն էլ իրենց մեղավոր էին ճանաչել, սակայն չէին միջնորդել արագացված դատական կարգ կիրառել:

Դատաքննության ընթացքում, երբ ուսումնասիրվեցին գործում եղած ապացույցները, հայտնի դարձավ, որ ամբաստանյալներից Սուսաննա Մնացականյանը սոցիալապես անապահով վիճակում է, ինչի համար համալսարանում նրա վարձավճարը զեղչել են, իսկ Արամ Հայրյանը երկրորդ կուրսում հեռացվել է համալսարանից վարձավճարը չվճարելու համար, սակայն հետո վերականգնվել է:

Հաջորդ դատական նիստում դատավորը կհրապարակի դատավճիռը: