Եվս մեկ սկանդալ՝ թուրքական դպրոցում. տնօրենը աշակերտի գլխով մաքրել է գրատախտակը

Թուրքիայի դպրոցներում շարունակվում են սկանդալները:

Ըստ t24-ի՝ մայրաքաղաք Անկարայում Ալի Շիր Նեւայի անվան միջնակարգ դպրոցում տնօրեն Սուլեյման Յիյիթը, քաշելով աշակերտի ականջը, նրա գլխով մաքրել է գրատախտակը:

Աշակերտներից մեկը տեսագրել է դեպքը, այն ցուցադրել են նաև հեռուստացույցով: Տեսանյութում տնօրենն սկսել է հանդիմանել աշակերտին` ասելով. «Ես քեզ չասացի՞  մաքրես այստեղ: Ինչո՞ւ չես մաքրել»: Այնուհետև նա քաշել է աշակերտի ականջն ու նրա գլխով մաքրել գրատախտակը:

Մեկ ամիս առաջ նույն տնօրենը դպրոցում մզկիթ էր բացել:

Նշենք, որ Թուրքիայի դպրոցներում վերջին շրջանում սկանդալային դեպքերը հաճախակի են դարձել: Երեկ 51-ամյա ուսուցիչը, պնդելով, որ երազում տեսել է իր և իր աշակերտուհու ամուսնությունը, 10-ամյա երեխայի ձեռքն էր խնդրել նրա հորից, ինչից հետո կալանավորվել էր: