Անցյալը չի վերանում. ՀՀԿ-ական պատգամավորը՝ Սուրիկ Խաչատրյանի մասին

ԱԺ ՀՀԿ-ական պատգամավոր Արմեն Կարապետյանը, ով սյունեցի է, այսօր խորհրդարանում լրագրողների հետ զրույցում խոսեց Սյունիքի նորանշանակ մարզպետ Վահե Հակոբյանի և նախկին մարզպետ Սուրիկ Խաչատրյանի գործունեության ազդեցությունների մասին: Պատգամավորի խոսքով՝ կառավարությունը նոր թիմ է ձևավորում, և Սյունիքի նորանշանակ մարզպետի նշանակումն էլ այդ համատեքստում է:

«Սյունիքի նախկին մարզպետն էլ հայտարարել է, որ առողջական խնդիրների պատճառով է հրաժարվել շարունակել իր պաշտոնավարումը»,- ասաց պատգամավորը՝ հավելելով, որ անձամբ չի նկատել, որ նորանշանակ մարզպետ Վահե Հակոբյանը փորձ անի նվազեցնել նախկին մարզպետի ազդեցությունը:

«Եթե կառավարությունում ձևավորվում է նոր թիմ, չի նշանակում, որ պետք է վերացնել անցածը: Նոր կառավարությունը շարունակում է հին կառավարության ծրագրերը՝ փոփոխությունների ենթարկելով, բայց այն քաղաքականությունը, որը որդեգրել է ՀՀԿ-ն, այսօր շարունակվում է նորանշանակ մարզպետի կողմից»,- ասաց Կարապետյանը:

Հարցին, թե ներկայիս մարզպետը շարունակելո՞ւ է աշխատել նախկին մարզպետի ոճով, նա պատասխանեց. «Ցանկացած պաշտոնյա ունի իր տեսակետները, իր վարած քաղաքականությունը: Քաղաքականությունը նույնը կլինի, բայց աշխատաոճը, կարգապահության, պահանջկոտության ցուցանիշները ուրիշ կլինեն: Նոր մարզպետը կունենա իր աշխատաոճը: Մարդիկ կլինեն, որ գոհ կլինեն նոանշանակ մարզպետից, մարդիկ կլինեն, որ անձնական կապեր կունենան և կցանկանան, որ Սուրիկ Խաչատրյանը շարունակեր պաշտոնավարել»:

Կարապետյանի բնորոշմամբ՝ որևէ պաշտոնյա ամրագրված չէ իր պաշտոնում, և պետք է հասկանալ, որ պաշտոնը սեփականություն չէ: Անդրադառնալով Սուրիկ Խաչատրյանի հետագա գործունեությանը՝ պատգամավորը նշեց, որ Խաչատրյանը շարունակում է մնալ ՀՀԿ-ի թիմում և ՀՀԿ մարզային կառույցի ղեկավարի պաշտոնում:

«Չեմ կարծում, որ նեղսրտած է ՀՀԿ-ից, այս պահին նա առողջական խնդիրների պատճառով է հրաժարական տվել»,- ասաց Կարապետյանը: