Դիտորդների կարծիքով` ԱԺ ընտրություններով Արցախը ևս մեկ քայլ կանի ժողովրդավարության ճանապարհին

Արդեն տեղեկացրել էինք, որ խորհրդարանական ընտրություններին ընդառաջ դիտորդական առաքելություն իրականացնելու նպատակով Արցախ է  ժամանել ավելի քան 100 միջազգային դիտորդ:

 Ինչպես Ստեփանակերտից հաղորդում է Yerkir.am-ի թղթակիցը, նախօրեին Գերմանիայից, Իսպանիայից, Հունաստանից, Բուլղարիայից ժամանած միջազգային դիտորդները հանդիպումներ են ունեցել ՀՅԴ Արցախի կենտրոնական կոմիտեի անդամների ` Արմեն Սարգսյանի, Վահրամ Բալայանի, Գեորգի Պետրոսյանի (ԼՂՀ նախկին արտգործնախարար) հետ: Տեղեկացնենք, որ դիտորդական առաքելություն իրականացնողների և ՀՅԴ Արցախի ԿԿ անդամների հետ հանդիպումներ են տեղի ունեցել նաև մայիսի մեկին:

Հանդիպմանը մասնակցել են նաև Եվրոպական խորհրդարանի պատգամավոր, Եվրամիություն-Հայաստան բարեկամության խմբի ղեկավար Էլենի Թեոխարուսը, ՀՀ-ում Գերմանիայի նախկին դեսպան Հանս-Յոհեն Շմիդտը, ինչպես նաև ՀՅԴ Եվրոպայի Հայ Դատի գրասենյակի պատասխանատու Գասպար Կարապետյանը: ՀՅԴ Արցախի ԿԿ անդամ Արմեն Սարգսյանի բնորոշմամբ` դիտորդների այցն Արցախ բավականին կարևոր է: Ըստ ՀՅԴ-ականի` ժողովրդավարությունն Արցախում կառուցվում է ոչ միայն արցախցիների ջանքերով, այլ նաև բարեկամների:

 Դիտորդների կարծիքով` ԱԺ ընտրություններով Արցախը ևս մեկ քայլ կանի ժողովրդավարության ճանապարհին: