Ձանձրացել եմ կյանքից. Արևաշատում ինքնասպան եղած կինը երկտող է թողել

Երեկ հերթական ինքնասպանության դեպքն է տեղի ունեցել Արմավիրի մարզում: Ժամը 18:00-ի սահմաններում ահազանգ է ստացվել ոստիկանության Վաղարշապատի բաժին, որ Արևաշատ գյուղի տներից մեկում կնոջ դի կա կախված:

Yerkir.am-ի տեղեկություններով՝ մահացածը Ջավախքի բնակիչ, 55-ամյա Նազիկ Սողոյանն է:

Մեզ հետ զրույցում Արևաշատի գյուղապետ Սուսաննա Գևորգյանը հայտնեց, որ Նազիկը Ջավախքում բնակվում էր մոր հետ, և հյուր էր եկել Արևաշատում  բնակվող հորեղբոր դստերը: Գյուղապետի խոսքով՝ կինը վատառողջ էր և դեպքի օրն էլ գանգատվել է առողջականից: «Այդ օրն առավոտ էլ վատ է զգացել, գլխացավ է ունեցել, տանտերերն էլ գնացել էին հիվանդատես, վերադարձել տեսել են՝ կախված է»,-ասաց նա և հավելեց, որ կինը մահվանից առաջ երկտող է թողել , որտեղ գրել է.

«Ձանձրացել եմ կյանքից, հարազատներիցս գոհ եմ, ոչ մեկին չմեղադրեք»:

Գյուղապետը նաև տեղեկացրեց, որ Նազիկը մի որդի ուներ, ով բնակվում էր Վլադիկավկազում: «Որդին ամուսնալուծվել էր, նա այդ փաստը շատ ծանր էր տարել, երևի, որ մենակ էր մնացել՝ շատ է նեղվել»,-ասաց տիկին Գևորգյանը: Նա նշեց, որ Վրաստանից պետք է հարազատները ժամանան և որոշեն՝ որտեղ հուղարկավորել կնոջը: