Ստանիսլավսկու թատրոնի «բիզնեսների» թնջուկն ու մշակույթի նախարարության լռությունը

Տեղեկացրել էինք, որ դեռ մարտ ամսին «Ժողովուրդ» օրաթերթը գրել էր, որ Երևանի Ստանիսլավսկու անվան ռուսական պետական դրամատիկական թատրոնի գեղարվեստական ղեկավար և գլխավոր ռեժիսոր, ՀՀ ժողովրդական արտիստ Ալեքսանդր Գրիգորյանը թատրոնը «վերածել» է բիզնես-կենտրոնի: Թերթի տեղեկություններով` Ալեքսանդր Գրիգորյանի փեսան` Էրվին Ամիրյանը, թատրոնի շենքում սառույցի արտադրամաս է հիմնել: Իսկ Գրիգորյանի դուստրը՝ Նորա Գրիգորյանը, «7th heaven» անվամբ հարսանյաց սրահ է բացել թատրոնի հարակից տարածքում:

Yerkir.am-ն այցելեց թատրոն` տեղում իրավիճակին ծանոթանալու: Տեղում սառույցի արտադրամասի փոխարեն «հայտնաբերեցինք» վարձով տրվող տարածքներ, որտեղ գործում էին տուրիզմի` ավիատոմսերի առք ու վաճառքի, հուշանվերների խանութ-գրասենյակներ: Թատրոնն ունի նաև մեծ նկուղ, որն էլ որպես պահեստ է ծառայում:

Զրուցեցինք Ալեքսանդր Գրիգորյանի հետ, ով նշեց, որ տարածված տեղեկությունները չեն համապատասխանում իրականությանը: «Այդ ամենը սուտ է, սադրանքներ են, ոչ մի սառույցի արտադրամաս էլ չկա»,- վստահեցրեց նա: 

Yerkir.am-ի հետ զրույցում թատրոնի տնօրեն Ֆրեդերիկ Դավթյանը նշեց, որ թատրոնի շենքը պետական սեփականություն է,  և գույքը տնօրինում է ՊԵԿ-ը: Ըստ նրա` քանի որ թատրոնը ՊՈԱԿ-ի կարգավիճակում է, ըստ օրենքի` մինչև 1 տարի ժամկետով թատրոնն իրավունք ունի /դիմելով մշակույթի նախարարությանը/ տարածք հանձնել վարձակալության:

«Թատրոնն ունի նման տարածքներ, որոնք տրվում են վարձակալության, բայց թատրոնում չի կարող լինել սառույցի արտադրամաս, ոչ էլ թատրոնին կից հարսանյաց սրահ կա: Մենք մտածում ենք` այնպիսի ընկերություն լինի տարածքում, որ չխանգարի թատրոնի գործունեությանը»,- ասաց Դավթյանը:

Ըստ նրա` այս խոսակցությունները սկիզբ են առել այն ժամանակ, երբ դեռ փետրվար ամսին իրենց աշխատակիցներից մեկը, սեփական դիմումի համաձայն, որոշել է դուրս գալ թատրոնից: Թատրոնի տնօրենի հավաստմամբ` այդ աշխատակիցը լսել է, որ Գրիգորյանի աղջիկն ու փեսան ցանկանում են ինչ-որ գործունեություն ծավալել, բայց ոչ` թատրոնի տարածքում, ինչից էլ սկիզբ է առել այդ ամենը:

«Մտածում եմ` կարո՞ղ է քաղաքական քամիներ են: Ես պետք է այդ ամենը վերլուծեմ: Ասում են` կարո՞ղ է` թատրոնը փակվի, ախր, հեշտ չի, է, ռուսական պետական թատրոն փակել: Իմ կարծիքով` ուղղությունը բռնած էր հենց պարոն Գրիգորյանի վրա»,- ասաց թատրոնի տնօրենը:

Ի դեպ, նա տեղեկացրեց նաև, որ վերջին 2-3 շաբաթվա ընթացքում մշակույթի նախարարությունից և ՊԵԿ-ից ներկայացուցիչներ են այցելել թատրոն, տարածքները, պայմանագրերը ստուգել և ոչինչ չեն հայտնաբերել:

Yekir.am-ը գրավոր դիմել էր մշակույթի նախարարություն` հարցի հետ կապված նախարարության դիրքորոշումն իմանալու: Նախարարությունից ստացել էինք լղոզված պատասխան /հարցին պատասխանել էր փոխնախարար Արև Սամուելյանը/, թե` «Ներկայում թատրոնի տարածքում սառույցի արտադրամասի կամ «7th heaven» անվամբ հարսանյաց սրահի գործունեություն ծավալելու համար տարածքների վարձակալության տրամադրման հայտեր մշակույթի նախարարությունը չի ստացել»:

Մեղմ ասած` զարմանալի է, որ նախարարությունը չի շտապում կամ չի էլ ցանկանում հայտարարել, որ ստուգումներ են անցկացրել, և հրապարակել դրանց արդյունքը` եղած լուրերը հերքել կամ հաստատելու համար:

Ի դեպ, դրանց արդյունքը հրապարակել էր խոստացել նաև մշակույթի նախարարը. օրեր առաջ մշակույթի նախարար Հասմիկ Պողոսյանը hraparak.am-ի հետ զրույցում նշել էր, թե տեղյակ էր այդ լուրերին, այդ ահազանգն իրենք էլ են ստացե, նաև նշել էր, որ «էս երկու օրը պաշտոնական հայտարարություն կտարածեն»: «Թատրոնն ինչ-որ տնտեսվարող գործընթացների մեջ ա՝ ՊՈԱԿ-ի հետ կապված, որոնք, կարծում եմ, ճիշտ որոշումներ չեն ընդունվել, բայց իմ տեղակալը հիմա էդ հարցով զբաղվում ա, պարզաբանումներ ենք ուզել տնօրինությունից, մինչեւ տեսնենք ինչ ա»,- ասել էր նախարարը:

Թե ո՞ր տեղակալն է զբաղվում այդ հարցով, պարզ չէ, բայց մեր հարցման պատասխանից պարզ էր դառնում մեկ բան` նախարարությունը սպասում է` տարածքի վարձակալման հետ կապված որևէ հայտ ստանա թատրոնից և նոր միայն միգուցե զբաղվի այդ հարցով: Մշակույթի նախարարությունում ձախ ձեռքը չգիտի՞` ինչ է անում աջը: Թե ինչի՞ց է սկիզբ առնում այս հակասությունը և ում է ձեռնտու այն, պարզ չէ, հուսանք` նախարարը, ինչպես և խոստացել էր, հանդես կգա պաշտոնական հայտարարությամբ:

Կարինե Հարությունյան