Թող վեկալի գործարանն ու ուրիշ տեղ տեղափոխի. Վարդան Այվազյանը` սահմանամերձ համայնքի բիզնեսների մասին

Այսօր ԱԺ տնտեսական հարցերի մշտական հանձնաժողովի նիստում քննարկվում էր «Շրջանառության հարկի մասին» օրենքում փոփոխություններ կատարելու մասին հարցը, որով առաջարկվում է հարկային արտոնություններ սահմանել սահմանամերձ համայնքներում գործող գործարարների ու ՓՄՁ-ների համար:

ԱԺ ՀՀԿ խմբակցության պատգամավոր Ալիկ Պետրոսյանը հետաքրքրվեց, թե ի՞նչ ճակատագիր է սպասվում այն գործարարին, ով բիզնես է դրել սահմանամերձ համայնքում, սակայն սկսվել են կրակոցներ ու լարվածություն, ի՞նչ պետք է անի այդ գործարարը, երբ չկարողանա աշխատեցնել այն:«Ուրեմն` ինձի խաբեն, բերեն, ես գործարան սարքեմ, հետո նստեմ լացե՞մ էդ գործարանի վրա»,- հարցրեց Ալիկ Պետրոսյանը:

Վարդան Այվազյանը շփոթվեց հարցից: «Դե, թող վեկալի գործարանն ու ուրիշ տեղ տանի»,- ասաց նա` հավելելով, որ խաբելու հարց չկա, որովհետև մինչ այժմ որևէ գործարար չի խաբվել` բիզնեսը տեղափոխելով սահմանամերձ համայնք:

ԱԺ պատգամավոր Խաչատուր Քոքոբելյանը հարցրեց, թե վերջապես ե՞րբ է հաստատվելու այն սահմանամերձ համայնքների ցանկը, որտեղ գործելու են հարկային արտոնությունները:

Վարդան Այվազյանը պատասխանեց, որ կառավարությունն է սահմանում այդ ցանկը, և առաջարկեց ֆինանսների փոխնախարարին վերջապես կազմել այդ ամփոփաթերթիկը, երբ օրենքը քննարկվի քառօրյայի օրակարգում: