Խոսքը կոնկրետ ո՞րի մասին է. Արմեն Դարբինյանը՝ հոր դեմ ներկայացված դատական հայցի մասին

ՀՀ նախկին վարչապետ, Սլավոնական համալսարանի ռեկտոր Արմեն Դարբինյանը Yerkir.am-ի հետ զրույցում նախ նշեց, թե իբր ինքը տեղյակ չէ, թե իր հոր՝ «Մսի կոմբինատ» ՓԲԸ-ի գլխավոր տնօրեն Ռազմիկ Դարբինյանի դեմ ինչ դատական հայց է ներկայացվել, ապա ասաց, որ ինքն առանձնապես գործ չունի հոր ծավալած գործունեության հետ: «Խոսքը կոնկրետ ո՞ր դատական հայցի մասին է, ես չգիտեմ, որի մասին եք խոսում, բայց տնտեսությունում ցանկացած բիզնես մասնակից կարող է ունենալ ցանկացած հարց ցանկացած սուբյեկտի հետ»,- ասաց նա:

Դարբինյանը կրկին շեշտեց, որ հոր ծավալած գործունեության հետ կապ չունի: «Ճիշտ հասցեով չեք զանգահարել: Ճիշտ հարցերով չեք զբաղվում: Երկրում ավելի լուրջ հարցեր կան: Ի՞նչ արտասովոր բան կա դրա մեջ, դատարաններում հարյուրհազարավոր դատական գործեր կան, դա նորմալ բան է: Դա եսիմ ինչ երևույթ չէ, որ մի հատ էլ արձագանքենք»,- նշեց Սլավոնական համալսարանի ռեկտորը:

Տեղեկացնենք, որ, համաձայն «Ժողովուրդ»-ի հրապարակման, Երևանի Էրեբունի և Նուբարաշեն վարչական շրջանների դատախազությունը դատական հայց է ներկայացրել նախկին վարչապետ, Սլավոնական համալսարանի ռեկտոր Արմեն Դարբինյանի հոր՝ «Մսի կոմբինատ» ՓԲԸ-ի գլխավոր տնօրեն Ռազմիկ Դարբինյանի դեմ: Դատախազությունը 2014թ. մարտի 18-ի իր հայցադիմումով Ռազմիկ Դարբինյանից պահանջել է հօգուտ պետական բյուջեի գանձել 12 միլիոն 477 հազար 120 դրամ: