Եթե գյուղացիները դեմ լինեն, համայնքների խոշորացում չի լինի

ՀՀ տարածքային կառավարման նախարարության տեղական ինքնակառավարման վարչության պետ Աշոտ Գիլոյանն այսօր լրագրողներին վստահեցրեց, որ համայնքերի խոշորացման ծրագրերին դեմ գյուղացիների կարծիքն ամենևին էլ չի անտեսվելու: «Եթե հանրաքվե լինի, և հանրաքվեի ընթացքում գյուղացիների մեծամասնությունը դեմ արտահայտվի, ապա խոշորացում չի լինի»,- ասաց նա:

Գիլոյանը նշեց, որ երբ իրենք շրջում են գյուղերով և գյուղացիներին բացատրում՝ ինչ է իրենից ներկայացնում համայնքների խոշորացումը, նրանք էլ են հասկանում, որ խոշորացման մեջ ոչ մի վատ բան չկա:

Հիշեցնենք, որ Yerkir.am-ի հետ զրույցում Աշոտ Գիլոյանը, վկայակոչելով ՀՀ Սահմանադրության 110-ը հոդվածը, նշել էր, որ եթե կառավարությունը որոշի՝ պետք է համայնքները խոշորացվեն, վարչատարածքային համայնքներում պետք է փոփոխություններ արվեն: Այնտեղ գրաված է նաև, որ հանրաքվեի արդյունքները պարտադիր չեն:

«Գյուղացիների մեծ մասը դեմ չէ խոշորացմանը, ես այդպիսի տպավորություն եմ ստացել»,- ասաց Գիլոյանը:

Դիտարկմանը, թե համայնքների խոշորացումը բազմաթիվ խնդիրների առջև է կանգնեցնում հասարակությանը, քանի որ բազմաթիվ մարդիկ դառնում են գործազուրկ, Գիլոյանը պատասխանեց. «Ես արդեն նշել եմ, որ գյուղապետերը կարող են դառնալ համայնքի ներկայացուցիչներ, այնպես որ` խնդիր չի լինի»:

Նա նշեց նաև, որ մյուս աշխատակիցներն էլ կարող են որոշակի պաշտոններ զբաղեցնել, սակայն չնշեց, թե կոնկրետ ի՞նչ պաշտոնների մասին է խոսքը, և ի՞նչ հիմունքներով են դրանք վստահվելու համայնքների խոշարացման արդյունքում գործազուրկ դարձած աշխատակիցներին: