Մեր ազգի, մեր ֆուտբոլի համար ես ամեն ինչի պատրաստ եմ. Վարուժան Սուքիասյան

Հայաստանի ֆուտբոլի հավաքականի նախկին գլխավոր մարզիչ Վարուժան Սուքիասյանը Yerkir.am-ի հետ զրույցում, անդրադառնալով Բեռնար Շալանդի մարզչական աշխատանքին, մասնավորապես նրա՝ գլխավոր մարզչի պաշտոնից հեռանալուն, կարծիք հայտնեց, որ ֆեդերացիան այդ մասով ճիշտ որոշում է կայացրել, հետո հավելեց, որ մարզչին իր արդյունքների, նվաճումների համար են գնահատում: «Ես հաստատ հրաժարական կտայի»,- ասաց Սուքիասյանը:

«Իսկ եթե Ձեզ առաջարկեն զբաղեցնել գլխավոր մարզչի պաշտոնը, կհամաձայնե՞ք»,- հետաքրքրվեցինք նրանից: «Մեր ազգի, մեր ֆուտբոլի համար ես ամեն ինչի պատրաստ եմ»,- ասաց Սուքիասյանը:

Դիտարկմանը, թե պատրաստ է թողնել անգամ իր ղեկավարած ՊՈԱԿ-ը (Սուքիասյանը «Բնակչության հատուկ սպասարկում» ՓԲԸ-ի, այլ կերպ ասած` թաղման բյուրոյի նախագահն է), պատասխանեց, որ դա «ղեկավարության որոշելիքն է»:

Սուքիասյանն ընդգծեց նաեւ, որ եթե առաջարկություն լինի, ամեն ինչ կախված կլինի նաեւ բանակցություններից: Ասաց, որ այս պահին դեռ նման առաջարկություն չկա: Նաև հայտնեց, որ գոհ է ՀՖՖ նախագահ Ռուբեն Հայրապետյանի աշխատանքից:

«Այսօր ամեն պայման ֆեդերացիան ստեղծել է: Երբեք նման լավ վիճակ չի եղել: «Ոչ» բառը չկա, մնում է, որ մեր տղաները խաղան: Այսօր մեր թիմի առաջին խնդիրն այն է, որ տղաները լավ մարզավիճակում չեն: Դա կախված է նրանից, որ շատերը խաղային մարզավիճակից զրկված են: Հետո հոգեբանական խնդիրներ էլ կան: Բայց ես մի բանում վստահ եմ, որ պետք չէ հուսահատվել: Մենք ունենք ունակ եւ ուժեղ հավաքական: Կարելի է սթափվել եւ հավաքվել»,- ասաց Սուքիասյանը:

Yerkir.am-ի դիտարկմանը, թե, այդուհանդերձ, շատերը գլխացավանք են համարում գլխավոր մարզչի պաշտոնը ստանձնելը, նման ակնարկ իր հարցազրույցներից մեկում արել է նաեւ «Արարատ-73»-ի դարպասապահ, «Արարատ-2»-ի դարպասապահների մարզիչ Ալյոշա Աբրահամյանը (խմբ. – ասել է՝ գլուխս ցավի տակ չեմ դնի), Սուքիասյանն արձագանքեց. «Սա ազգի խնդիր է, ոչ թե անձի: Ես նման մտածելակերպ չունեմ: Ես որքան աշխատել եմ, աշխատել եմ լինել լիդեր, աշխատել եմ լինել չեմպիոն, աշխատել եմ մարտական բնավորությամբ»:

Ի դեպ, Yerkir.am-ի տեղեկություններով` ֆուտբոլային աշխարհում լուրեր են շրջանառվում, որ Սուքիասյանը գլխավոր մարզչի պաշտոնի ամենահավանական թեկնածուների թվում է:

Լուսանկարը` Armsport.am-ի