Մշակույթի նախարարին Ճոյտի ֆիլմը դուր չի եկել

Հակոբ Հակոբյանի սցենարի հիման վրա նկարահանված «Հիշողություն» ֆիլմը, կարծես, հիշողության գիրկն է ընկնում: Ֆիլմի ռեժիսոր Քաջայր Հակոբյանը լրագրողների հետ զրույցում նշել էր, որ ֆիլմի փակ դիտման ը ներկա է եղել նաև մշակույթի նախարար Հասմիկ Պողոսյանը:

Նախարարը, ըստ ռեժիսորի, ասել է, թե գոհ է, գնահատելի է ռեժիսորական, օպերատորական աշխատանքը և դերասանների մի մասի խաղը: Վերապահումները վերաբերել են քաղաքական բովանդակությանը, և ռեժիսորը հետագայում շտկումներ է արել:

Yerkir.am-ը գրավոր հարցում էր ուղարկել մշակույթի նախարարություն` իմանալու` արդյո՞ք մշակույթի նախարարը գոհ էր մնացել: Մեր հարցմանն ի պատասխան` նախարարությունից տեղեկացրել էին, որ, այո, նախարարը մասնակցել է «Հիշողություն» ֆիլմի փակ դիտմանը:

«Նախարարը մատնանշել է ֆիլմի սցենարի ստեղծման գործընթացում արհեստավարժ մասնագետների ներգրավվածության, նրանց հետ քննարկումների և խորհրդատվության խիստ պակասը: Բնականաբար, ֆիլմից ստացված տպավորություններով է պայմանավորված վերոնշյալ դիտարկումները»,- ասվում է նախարարության պատասխանում: