Ճոյտի որդին դուրս է եկել հիվանդանոցից՝ հորեղբոր հոգեհանգստին մասնակցելու համար

Մայիսի 26-ին Արմավիրի մարզում գազալցակայանի պայթյունից տուժած` ԱԺ նախկին պատգամավոր Հակոբ Հակոբյանի որդին՝ Արմեն Հակոբյանը, չնայած վիճակին, այսօր դուրս է եկել հիվանդանոցից՝ հորեղբոր հոգեհանգստին մասնակցելու:

Երևանի այրվածքաբանական կենտրոնի տնօրեն Նորայր Դավիդյանը yerkir.am-ի հետ զրույցում հայտնեց, որ Արմեն Հակոբյանի վիճակը բավարար է գնահատվում:

Հիշեցնենք, որ Հակոբ Հակոբյանի եղբայրը՝ 50-ամյա Արմեն Հակոբյանը, երեկ հիվանդանոցում մահացել էր: Վթարից տուժած` գազալցակայանի աշխատակից Արթուր Գասպարյանը, ով համեմատաբար թեթև վնասվածքներ էր ստացել, գտնվում է հիվանդասենյակում: Դեպքի առթիվ նախապատրաստված նյութերով Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 2-րդ կետի հատկանիշներով։ Կատարվում է նախաքննություն: