Դա էլ իր վերջն ու վախճանը պետք է ունենա. Գալուստ Սահակյան

Այսօր լրագրողները ԱԺ նախագահին բազմաթիվ հարցեր ունեին, մասնավորապես՝ Գագիկ Ծառուկյանին պատգամավորական մանդատից զրկելու վերաբերյալ:

«Ցանկացած հարց, միայն՝ կոռեկտ»,- նախ նշեց Գալուստ Սահակյանը:

Լրագրողները հարցրեցին` ինչո՞ւ են մինչև հիմա հարգելի համարվել Գագիկ Ծառուկյանի բացակայությունները, և միայն նախագահի ելույթից հետո որոշվեց վերանայել նրա բացակայությունների հարցը: 

«Երբ որ արդեն ուսումնասիրությունները կավարտվեն, իսկ թե ի՞նչ հիմքով են ազատելու պատգամավորական մանդատից, դա հանձնարարվել է աշխատակազմին, կներկայացնեն, կզեկուցեն, այնուհետև ես կորոշեմ»,- ասաց Գալուստ Սահակյանը:

Ճշտող հարցին` արդյո՞ք Գագիկ Ծառուկյանի ձեռնարկատիրական գործունեությունն է լինելու մանդատից զրկելու հիմքը, թե՞ բացակայությունները, ԱԺ նախագահը պատասխանեց. «Ձեռնարկատիրական գործունեությունը ԱԺ նախագահը չի կարող բնութագրել, դա նրա լիազորությունների շրջանակում չէ»: Նա նշեց, որ բացակայությունների հարցը «բևեռված չէ» և բոլորին է վերաբերում` բոլոր խմբակցություններին:

Հարցին, թե արդյո՞ք դա քաղաքական հետապնդում չէ, Գալուստ Սահակյանը պատասխանեց. «Ոչ մի քաղաքական հետապնդման խնդիր գոյություն չունի, պարզապես մենք միշտ փորձել ենք խորհրդարանում այնպիսի վիճակ ստեղծել, որ լարվածություններ չառաջանան, ու համագործակցություն լինի: Բայց դա էլ իր վերջն ու վախճանը պետք է ունենա»: