Բիթլիսում Վիլյամ Սարոյանի անվան գրադարան կբացվի և նրա տունը կվերածվի թանգարանի

Ամերիկահայ գրող Վիլյամ Սարոյանի անվամբ կանվանակոչվի Բիթլիսում բացվող գադարանը. տեղեկացնում է «Ակօս»-ը:

Գաղափարի հեղինակը լրագրող Ահմեթ Թուլգարն է, ով Բիթլիսի համաքաղաքապետ Հուսեյին Օլանին է հայտնել իր նախաձեռնության մասին` տեղեկացնելով, որ քաղաքապետարանն այդ մտքին դրական է նայում:

Թուլգարը հայտնել է, որ Սարոյանի անվան գրադարանի բացման միտքը ծագել է Բիթլիսում փողոցը Սարոյանի անվամբ անվանակոչելու ժամանակ: Նա հավատում է, որ «գրադարանը կլինի այդ հողերում հայերի ունեցած ներդրումների և, առհասարակ, գրականության հանդեպ հարգանքի ու երախտագիտության արտահայտում»:

Թուլգարը նշել է, որ Սարոյանի անվան գրադարանի ստեղծման համար սկսել են նվիրատվություններ հավաքել: Գրադարանում, բացի Սարոյանի գրքերից ու հայ հեղինակների ստեղծագործություններից, լինելու են նաև այլ գրքեր:

Բիթլիսի համաքաղաքապետ Օլանն, իր հերթին, նշել է, որ վերանորոգվում է այն տունը, որտեղ Սարոյանի ընտանիքն է ապրել, և մտադիր են այն թանգարանի վերածել: