Հովիկ Աբրահամյանը խոստացել է օգնել առևտրականներին

Այսօր կառավարության շենքի առջեւ շարունակվել է առևտրականների բողոքն ընդդեմ շրջանառության հարկի: Կառավարության նիստի ավարտից հետո վարչապետ Հովիկ Աբրահամյանն ընդունել է առևտրականներին և քննարկել խնդիրը:

Առևտրականները 4 խնդիր են առաջ քաշել: Առաջին հերթին` բարձրացնել շեմը մինչև 100 միլիոն դրամ, երկրորդ՝ առևտրականները մտավախություն ունեն, որ գույքագրման պահանջը հարկային տեսուչները կարող են շահագործել և անառիթ ստուգումներ իրականացնել: Առևտրականները նաև առաջարկել են վարչապետին, որպեսզի այն առևտրականները, ովքեր ցանկանում են աշխատել փաստաթղթերով և 1 տոկոս շրջանառության հարկով, թող աշխատեն այդ հարկման դաշտում, իսկ նրանք, ովքեր չեն ցանկանում աշխատել պարտադիր փաստաթղթավորմամբ, նրանց համար կիրառվի 3.5 տոկոս շրջանառության հարկ:

Վարչապետը խոստացել է առևտրականներին` քննարկել նրանց առաջարկները և երկուշաբթի ժամը 18.00-ին առաջարկել լուծումները: Ըստ առևտրականների՝ Հովիկ Աբրահամյանը բավական լավ տրամադրություն է ունեցել և խոստացել է օգնել իրենց: