Վաղ, թե ուշ ԵՄ-ն կհասկանա Թուրքիայի կարեւորությունը. Դավութօղլու

Վաղ, թե ուշ ԵՄ-ն կհասկանա Թուրքիայի՝ այս միությանը անդամակցելու կարևորությունը. ասել է Թուրքիայի վարչապետ Ահմեդ Դավութօղլուն: Այդ մասին տեղեկացնում է ադրբեջանական Trend.az-ը՝ վկայակոչելով թուրքական Haber7-ը:

Դավութօղլուն ընդգծել է, որ Թուրքիան չի պատրաստվում անդամակցություն խնդրել Եվրամիությունից` հավելելով նաեւ, որ ԵՄ երկրների միջեւ միասնականություն չկա:

Պաշտոնական բանակցությունները Թուրքիայի՝ ԵՄ-ին անդամակցության վերաբերյալ վերսկսվել են 2005 թվականին: «Թուրքիայի անդամակցությունը ԵՄ-ին այլեւս գրավիչ չէ երկրի քաղաքացիների համար»,- ավելի վաղ ասել էր Թուրքիայի փոխվարչապետ Բյուլենթ Արընչը: Նա հայտնել էր, որ նախկինում Թուրքիայի բնակչության 75 տոկոսը կողմ եղել է երկրի անդամակցությունը ԵՄ-ին, սակայն այժմ այդ ցուցանիշը կազմում է 20 տոկոս:

Ըստ երկրի պաշտոնատար անձանց՝ Թուրքիան կատարել է ԵՄ անդամակցության համար անհրաժեշտ իր պարտավորությունների 65 տոկոսը: