50 քառակուսի մետրը մի քիչ շատ չի՞ տնօրենի համար. Հովիկ Աբրահամյանը՝ Արման Սահակյանին

Այսօր ՀՀ կառավարության նիստում պետական գույքի կառավարման վարչության պետ Արման Սահակյանը կառավարության հաստատմանը ներկայացրեց որոշման նախագիծ Հայաստանում գրահրատարակչական գործունեություն իրականացնող իրավաբանական անձանց և անհատ ձեռնարկատերերին պետական սեփականություն հանդիսացող անշարժ գույքի անհատույց օգտագործման տրամադրման չափորոշիչները հաստատելու մասին:

Այդ որոշման 4-րդ կետում նշված չափորոշիչներին համապատասխանող՝ գրահրատարակչական գործունեություն իրականացնող իրավաբանական անձանց կամ անհատ ձեռնարկատերերին տրամադրվում է մեկ աշխատողի հաշվով` 6 - 8 քառ. մետր մակերեսով տարածք, 1 սենյակ` տնօրենի համար, 1 սենյակ /30-50 քառ. մետր մակերեսով/` որպես արխիվ-պահեստ, ինչպես նաև լրացուցիչ 1 սենյակ` պայմանագրային հիմունքներով աշխատողների համար:

Վարչապետ Հովիկ Աբրահամյանը տարակուսեց. «50 քառակուսի մետրը մի քիչ շատ չի՞ տնօրենի համար: Ինչի՞ համար է այդքան մեծ սենյակը»:

Արման Սահակյանը նշեց, որ ներկայումս Իսահակյան 28 շենքում տեղակայված են գրահրատարակիչներ, ըստ չափորոշիչների` բավական մեծ տարածություն են կորցնում նրանք, և այդ հարցը բարձրացրել են, քանի որ չեն կարողանում ունենալ պահեստային սենյակ և տնօրենի սենյակ:

«Հա, բայց 50 քմ-ն տնօրենի համար շատ մեծ է: Հիսուն քառակուսի, կարծում եմ, շատ մեծ է, 30-ից 40 է գրած, բայց 50 քմ-ն տնօրենն ի՞նչ պետք է անի, երեսունը բավական է, մնացածում աշխատողներին թող տեղ տան»,- ասաց Հովիկ Աբրահամյանը:

Դավիթ Հարությունյանը նշեց, որ ուսումնասիրել են խնդիրը, և իրականում դա տնօրենի սենյակ չէ, այն աշխատողների համար է: «Նրանք պայմանագրային մեծ թվով աշխատողներ են ներկայացնում, մեծ սենյակ է, որտեղ նստած են պայմանագրով աշխատող ձևավորողներ, խմբագիրներ»,- ասաց նա:

«Հա,  ավելի լավ ա` գրեք` աշխատակիցների սենյակ, միանգամից հասկանանք»,- ասաց վարչապետը:

Որոշումը հաստատվեց: