ԱՄՆ Մոնտեբելո քաղաքի նոր քաղաքապետը հայ է

ԱՄՆ Մոնտեբելո քաղաքի քաղաքապետ է ընտրվել Ջեք Հաջինյանը. տեղեկացնում է Asbarez-ը:

«Ծնված լինելով Մոնտեբելոյում՝ իմ սերն ու նվիրվածությունն եմ ներդնելու դրա բարգավաճման ուղղությամբ»,- ասել է նորընտիր քաղաքապետը նոյեմբերի 25-ին կայացած երդման արարողության ժամանակ:

Որպես Մենտեբելոյի երկարամյա բնակիչ՝ Հաջինյանը ակտիվ մասնակցություն է ունեցել Մոնտեբելոյի քաղաքական ու տնտեսական կյանքին, հայկական տարբեր կազմակերպությունների աշխատանքներին, այդ թվում՝ եղել է Հայ Դատի հանձնախմբի և Մոնտեբելո-Ստեփանակերտ քույր քաղաքների խորհրդի անդամ, Ս. Խաչ եկեղեցու հոգաբարձուների խորհրդի գանձապահ: 2011 թվականին նա ընտրվել է Մոնտեբելոյի քաղաքային խորհրդի անդամ:

Հաջինյանի երդման արարողությանը ներկա է եղել 800 մարդ, այդ թվում՝ բարձրաստիճան պաշտոնյաներ Կալիֆոռնիայից, հոգևորականներ: