Մասիս քաղաքի և շրջակա համայնքների խմելու ջուրը պիտանի չէ. քաղաքապետը չգիտի` հարցը երբ կլուծվի

ՀՀ Արարատի մարզի Մասիս քաղաքի և շրջակա գյուղերի բնակիչները խմելու ջրի խնդիր ունեն: Նրանք խմելու ջուրը գնում են` մեկ լիտրը 10 դրամ արժողությամբ, քանի որ ծորակից հոսող ջուրը խմելու համար պիտանի չէ:

Խորհրդարանական ընտրությունների քարոզարշավի ժամանակ, ի դեպ, խնդիրը լուծվել էր այս տարածաշրջանից պատգամավոր ՀՀԿ-ական Մուրադ Մուրադյանի շնորհիվ: Ամբողջ շրջանի ջուրը փոխվել էր, և մատակարարվում էր խմելու համար պիտանի ջուր:

Yerkir.am-ին ահազանգած բնակիչները հայտնում են, որ իրենք հայտնվել են կոտրած տաշտակի առաջ, քանի որ կրկին մատակարարվում է հին` խմելու համար ոչ պիտանի ջուր:

Yerkir.am-ի հետ զրույցում Հանրապետական կուսակցությունից պատգամավոր ընտրված Մուրադ Մուրադյանը նշեց, որ տեղյակ էլ չէ, որ ջուրը կրկին փոխել են: «Ինձ ոչ մեկ չի դիմել, որ նման բան է եղել, նոր եմ տեղեկանում»,- ասաց նա, նաև խոստացավ, որ ԱԺ նիստերի ժամանակ խնդիրը կբարձրացնի:

Խնդրի առնչությամբ Yerkir.am-ը կապ հաստատեց Մասիսի քաղաքապետ Դավիթ Համբարձումյանի հետ: Նա նշեց, որ բնակիչները ճիշտ չեն ասում, թե նորմալ ջուր է մատակարարվել նախընտրական շրջանում: Ըստ նրա` ընտրություններից հետո է սկսվել նորմալ ջրի մատակարարումը, բայց վերջին շրջանում փոխվել է:  «Հիմա պայքարում ենք, որ կրկին ջրի խնդիրը լուծենք»,- ասաց քաղաքապետը և հաստատեց, որ այժմ մատակարարվող ջուրը խմելու համար ընդհանրապես պիտանի չէ:

«Փորձում ենք խնդիրը լուծել, բանակցում ենք «Վիոլա ջրի» հետ: Խոսել եմ ջրային տնտեսության պետական կոմիտեի ղեկավարի հետ: Տարածքային կառավարման և զարգացման նախարարի հետ էլ ենք զրուցել խնդրի շուրջ: Փորձում ենք ելքը գտնել: Ուղղակի ժամանակի հարց է»,- ասաց նա:

Քաղաքապետը նշեց, որ չի ցանկանում հստակ ժամանակ ասել, թե երբ վերջնականապես կլուծվի հարցը: «Ժամանակ չեմ ցանկանում նշել, մինչև վերջնական արդյունքի չհասնենք»,- ասաց նա: