Տիգրան Մանսուրյանի ծննդյան 75-ամյակին նվիրված հոբելյանական համերգը` նոյեմբերի 10-ին

Նոյեմբերի 10-ին Ալ. Սպենդիարյանի անվան օպերայի և բալետի ազգային ակադեմիական թատրոնում կկայանա ՀՀ ժողովրդական արտիստ, կոմպոզիտոր Տիգրան Մանսուրյանի ծննդյան 75-ամյակին նվիրված հոբելյանական համերգը:

Համերգին մասնակցելու են Հայաստանի պետական ֆիլհարմոնիկ նվագախումբը /գեղ. ղեկավար Էդ. Թոփչյան/, Հայաստանի պետական կամերային երգչախումբը /գեղ. ղեկավար Ռ. Մլքեյան/, «Հովեր» պետական կամերային երգչախումբը /գեղ. ղեկավար Ս. Հովհաննիսյան/, Երևանի պետական կամերային երգչախումբը /գեղ. ղեկավար Հ. Թոփիկյան/, Իրինա Զաքյանը /սոպրանո/, Երաժշտական դպրոցների հավաքական երգչախումբը /դիրիժորական վահանակի մոտ՝ Տ. Մանսուրյան/:

Հոբելյանական համերգի ծրագրում ընդգրկված են Տիգրան Մանսուրյանի չարենցյան և իսահակյանական երգչախմբային շարքերը, «Դպիր տաղ կարդալն», «Խուտուտ–մուտուտ», «Ասացվածք հոր համար», «Կինոերաժշտություն» /պոպուրի/, «Պարտիտ» սիմֆոնիկ նվագախմբի համար /3-րդ, 4-րդ մաս/, «Ես իմ անուշ Հայաստանի», «Հավատով խոստովանիմ» /հայաստանյան պրեմիերա/ սիմֆոնիկ, վոկալ և խմբերգային ստեղծագործությունները:

Երեկոյի ընթացքում անդրադարձ կկատարվի կոմպոզիտորի կինոերաժշտությանը, կցուցադրվեն դրվագներ կոմպոզիտորի կենսագրությունից: Համերգի ռեժիսորն է Արամ Սուքիասյանը: