Հալեպում անցկացվել է Համազգայինի 90-ամյակին նվիրված հոբելյանական միջոցառում

Կիրակի, 9 Դեկտեմբերին, «Գէորգ Եսայեան» սրահին մէջ տեղի ունեցաւ Համազգայինի 90ամեակի ձեռնարկը:

Ըստ «Գանձասար»ի՝ Կիրակի երեկոյեան, Համազգայինի Սուրիոյ Շրջանային վարչութեան կազմակերպած ձեռնարկով, կազմակերպիչ մարմինին երիտասարդները անակնկալ մը մատուցեցին բոլորին:

Անոնք հայ մշակոյթի կարկառուն դէմքերը բեմ բարձրացուցին, վերապրեցուցին, անոնց մտահոգութիւնները ներկայ զարգացումներուն առնչեցին, ապա Համազգայինի պատմական ու ներկայ դերը գեղարուեստական եւ թատերական ներկայացումով մը ըմբոշխնել տուին հանդիսատեսին:

Բեմականացումը կատարած էին Յուշիկ Ղազարեան, Շանթ Ուրիշեան եւ Գէորգ Արոյեան:

Ո՛չ քարոզներ, ոչ ալ յորդորներ հնչեցին բեմէն: Հայ մշակոյթին ու համաշխարհայնացման դեւին ճակատումն էր ու առաջինիս սփռած լոյսը՝ հայ երիտասարդութեան վրայ:

Բացման խօսքերէն ետք, Կոմիտասը յայտնուեցաւ բեմահարթակ: Ան զայրացած էր ու յուսահատ՝ հայ երգի ներկայ աղաւաղումին ու երիտասարդութեան անտարբերութեան ի տես: «Կեանքս նուիրեցի հայ երգին ու զայն ձեզի կտակեցի, որպէսզի այսպիսի վատորակ երգերո՞վ զուարճանաք…», կը լսէր թրքաբարոյ երգերն ու արդարօրէն կը բողոքէր Կոմիտասը, իսկ համաշխարհայնացման դեւը հեգնանքով քրքիջ մը կ՛արձակէր. «Հա՜ հա հա՜… ի՞նչ մշակոյթ, ի՞նչ որակ, դուք անմխիթար վիճակի մէջ էք, իրապաշտ եղէք ու մի՛ յուսաք որ նոր սերունդը կ՛ապրեցնէ ձեր մշակոյթը: Հա հա հա՜…:

Կոմիտաս յուսահատ, գլուխը յենած դաշնամուրին, հայ երգին անկումը կ՛ողբար: Ու յանկարծ, երիտասարդ տղաք ու աղջիկներ շարք առ շարք, գաղտագողի բեմահարթակ բարձրացան, խմբավարն ու դաշանակահարն ալ անձայն բեմ ելան ու Համազգայինի «Զուարթնոց» երգչախումբը հմայիչ կատարողութեամբ հնչեցուց Կոմիտասի երգերը: Կոմիտասի դէմքին ժպիտ մը ուրուագծուեցաւ: «Ո՞վ էք դուք, ո՞ւր սորված էք այս երգերը…», խանդավառուած խորունկ շունչ մը քաշեց ու բեմահարթակին վրայ ծալապատիկ նստելով՝ վերացաւ Կոմիտասը, իր իսկ երգերուն հմայքը վայելելով:

Հանդէս եկան Համազգայինի «Սարդարապատ» եւ «Շուշի» պարախումբերը ու հայկական պարերով տօնական մթնոլորտ մը տիրեց սրահին մէջ:

Ապա Համազգայինի «Բարսեղ Կանաչեան» երաժշտանոցի աշակերտները երաժշտական տարբեր գործիքներով հայ դասական եւ ժողովրդային ստեղծագործութիւններ հնչեցուցին: Այս ընթացքին, համազգայնականներ բեմի ճակատին մաս առ մաս տեղաւորեցին Համազգայինի նշանակը:

Այստեղ էր, որ համաշխարհայնացման դեւը անճրկեցաւ ու տեղի տուաւ:

Նման բեմականացումով համազգայնական երիտասարդները յոբելենական ձեռնարկը նորովի ոճով օժտեցին ու Համազգայինի դերակատարութեան էութիւնը պարզեցին:

Բանախօս, Համազգայինի Կեդրոնական վարչութեան անդամ Լորիկ Սապունճեան- Ծատուրեան, իր կարգին, նախ անդրադարձաւ Համազգայինի առաքելութեան, Կեդրոնական վարչութեան ծրագիրներուն: Ան ներկայ պայմաններուն եւ ճարտարագիտական զարգացումներուն լոյսին տակ առարկայական մօտեցումով Համազգայինի ժամանակակից ու նորարար աշխատանքին հրամայականը ընդգծեց:

Բերիոյ Հայոց թեմի առաջնորդը Համազգային Հայ Կրթական եւ Մշակութային Միութեան յոբելեանի այսօրինակ յիշատակումն ու իրագործումը նկատեց յանձնառութեան գեղեցկագոյն արտայայտութիւն, արտասովոր ու շնորհաւորելի քայլ:

Աւելցնենք, որ հանդիսութեան ներկայ էին Բերիոյ Հայոց թեմի առաջնորդը, Հայ կաթողիկէ համայնքի ներկայացուցիչը, Հայ աւետարանական համայնքի համայնքապետը, Հալէպի մօտ Հայաստանի գլխաւոր հիւպատոսը, Համազգայինի Կեդրոնական վարչութեան անդամներ՝ Սպարտակ Ղարաբաղցեան, Լորիկ Սապունճեան-Ծատուրեան, Անդրանիկ Մսըրլեան, Կարօ Ալեքսանեան, Շրջանային վարչութեան անդամներ, ինչպէս նաեւ հալէպահայ միութիւններու ներկայացուցիչներ: