Այս տարվա «Կինոաշունը» ` փարաջանովյան շնչով

Հոկտեմբերի 7-ին Վանաձորում կմեկնարկի «Կինոաշուն» 5-րդ ազգային կինոյի ծրագիրը: Այն այս տարի նվիրված է Սերգեյ Փարաջանովի 90-րդ հոբելյանին:

Լրագրողների հետ հանդիպման ժամանակ ՀՀ մշակույթի նախարարի տեղակալ Արթուր Պողոսյանը նշեց, որ ծրագիրն արդեն դարձել է ամենամասշտաբայինը իր միջոցառումներով և աշխարհագրությամբ:

«Այն ներառում է բոլոր մարզերը, զորամասերը, ուսումնական հաստատությունները. շուրջ 150 կինոդիտումներ են նախատեսված հանրապետության մարզերում և համայնքներում: Այս տարի ցուցադրություններ կլինեն նաև սահմանամերձ գյուղերում` Այգեպարում և Երասխում»,- ասաց Պողոսյանը:

Ի դեպ, սահմանամերձ գյուղերում կլինեն բացօթյա ցուցադրություններ, քանի որ տեղում տեխնիկական միջոցներ չկան: Պողոսյանը նշեց նաև, որ «Կինոաշունը», լինելով 5-րդը, արդեն ապացուցել է իր կարևորությունը:

Հայաստանի ազգային կինոկենտրոնի տնօրեն Գևորգ Գևորգյանն էլ նշեց, որ եթե նախկինում բավական բարդ էր ցուցադրություններ կազմակերպել, ապա  այժմ բոլոր մարզերից են զանգահարում և առաջարկում իրենց մոտ ցուցադրություններ անել: Գևորգյանը տեղեկացրեց նաև, որ «Կինոաշնան» շրջանակներում կանցկացվեն հանդիպումներ, կլոր-սեղաններ, կիրականացվեն կրթական ծրագրեր:

Ծրագիրը կմեկնարկի Փարաջանովին նվիրված ու Վանաձորի արդյունաբերական կյանքի մասին պատմող վավերագրական ֆիլմերի ցուցադրմամբ:

«Ուրախ եմ, որ հայկական կինոն դառնում է սպասելի ամբողջ հանրապետությունում, հատկապես, որ այն սպասելի է մարզերում ու զորամասերում»,- նշեց Գևորգյանը:

«Կինոաշուն»-ը նախորդ տարիների պես միաժամանակ կանցկացվի մարզերում և Երևանի համայնքներում՝ բազմազան կինոծրագրերով: Բուհերի համար հատուկ ընտրվել են վերջին երկու տարիներին նկարահանված ֆիլմերը, որոնց համար կհայտարարվի «Լավագույն գրախոսական» ավանդական մրցույթը: Արդեն երկրորդ անգամ «Կինոաշուն» ծրագրի շրջանակում կհայտարարվի «Հին և նոր երևանցի» թեմայով 7-10 րոպե տևողությամբ ֆիլմերի մրցույթ: Այս անգամ ևս կնշվեն անվանի կինոգործիչների՝ Առնոլդ Աղաբաբովի, Բագրատ Հովհաննիսյանի, Գենադի Մելքոնյանի, Արման Մանարյանի հոբելյանները. կլինեն նրանց ֆիլմերի հետահայաց ցուցադրությունններ:

«Կինոաշնան» փակումը տեղի կունենա նոյեմբերի 7-ին Արարատի մարզում: