″Կինոաշունը″ կատարեց իր առաքելությունը. գյուղերում սպասում են հայկական կինոյին

«Կինոաշուն 2013» ազգային կինոյի ամիս» ծրագիրն այս տարի հագեցած էր բազմաթիվ նոր ծրագրերով: Այն մեկնարկեց հոկտեմբերի 5–ին Գյումրիում եւ մեկ ամիս շարունակ շրջեց գյուղերում, սահմանամերձ բնակավայրերում, մարզերում, զորամասերում ու գրեթե բոլոր դպրոցներում:

Հայաստանի ազգային կինոկենտրոնի տնօրեն Գեւորգ Գեւորգյանը yerkir.am-ի հետ զրույցում նշեց, որ այս տարի ծրագիրը ֆենոմենալ աճ ապրեց, քանի որ բոլոր մարզերում 8-10 ցուցադրումներ են եղել:

«Կարող եմ ասել, որ ծրագիրն իր առաքելությունը կատարում է եւ հասնում յուրաքանչյուրին: Հայը սիրում է իր կինոն ու սպասում դրան»,- ասաց Գեւորգյանը:

Այս տարի «Կինոաշուն 2013»-ի շրջանակներում իրականացվում էր «Երեւանն իմ քաղաքն է» կինոմրցույթը, որի գլխավոր մրցանակին արժանացավ Նարե Գալստյանը «Երեւան ջան» ֆիլմի համար:

Կինոմրցույթի խրախուսական մրցանակը ստացան Դիանա Աթոյանը, Վահագն Գրիգորյանը, Վահրամ Ներսիսյանը «Սիրով ապրել Երեւանում» ֆիլմի համար:

Ինչպես միշտ, այս տարի նույնպես հայտարարվել էր գրախոսականների մրցույթ: Առաջին մրցանակը, ժյուրիի որոշմամբ, այդպես էլ չգտավ իր հասցեատիրոջը: Երկրորդ մրցանակը ստացավ Մարիա Թոքմաջյանը «Այդ ես չեմ» ֆիլմի մասին «Ֆիլմը եթե դոկումենտ չէ, ապա երազ է, անուրջ» գրախոսականի համար, իսկ երրորդ տեղը կիսեցին Ջուլիետա Տոնակյանը` «Ձայն լռության» ֆիլմի մասին «Մաեստրոյի «վեցերորդ պատվիրանի» փոխարեն» եւ Արփինե Փաշանյանը «Անվերջ փախուստ, հավերժ վերադարձ» ֆիլմի մասին «Ունայնության քամի» գրախոսականների համար: