Կինոաշունը փակեց իր էջը

Ծրագիրն աննախադեպ էր նրանով, որ ոչ թե ներկայացվեց կինոն առհասարակ, այլ` հայկական, ազգային կինոն. «Կինոաշուն-2011»-ի փակման արարողության ժամանակ ասաց ՀՀ մշակույթի փոխնախարար Արթուր Պողոսյանը:

Ազգային կինոկենտրոնի տնօրեն Գեւորգ Գեւորգյանը կինոկենտրոնի գլխավոր մրցանակը հանձնեց ծրագրի հովանավոր, Ռուսաստանի հայերի միության եւ Համաշխարհային հայկական կոնգրեսի նախագահ Արա Աբրահամյանին: Գեւորգյանը մրցանակներ հանձնեց նաեւ Երեւանի քաղաքապետարանին, Գորիսի մարզպետարանին, որտեղ էլ տրվել էր ծրագրի մեկնարկը:

Yerkir.am-ի հետ զրույցում Գեւորգյանը նշեց, որ այս տարի ծրագիրը հիանալի առաջընթաց է արձանագրել, քանի որ դահլիճում տեղերի 80-90 տոկոսը զբաղված է եղել. «Ճիշտ է, 1-2 դեպք գրանցվեց, երբ դպրոցականների էին բերել` դահլիճը լցնելու համար, սակայն իրականում, չհաշված նման դեպքերը, դահլիճները լեփ-լեցուն են եղել»:

Այն, որ այս տարի ծրագիրն, իրոք, հաջողված է եղել, փաստում է նաեւ հանգամանքը, որ Հայաստանի մի շարք մարզերում` Սյունիքում, Կոտայքում, Արմավիրում, կինոդիտումներ կազմակերպելու պայմանավորվածություն է ձեռք բերվել: