Ժիրինովսկին «խղճի» մասին փիլիսոփայել է Բաքվի դպրոցում

Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին Ադրբեջան կատարած այցի շրջանակում, նախագահ Ալիևի հետ հանդիպումից բացի, այցելել է նաև Բաքվի ռուսալեզու դպրոցներից մեկը, որտեղ գրականության դաս է անցկացրել 6-րդ դասարանի աշակերտների համար. հայտնում է Дни.ру-ն: Նա դասի ժամանակ վերլուծել է Տուրգենևի «Մումու» պատմվածքը:

Աշակերտուհիներից մեկն ասել է, որ խղճում է Գերասիմին, քանի որ նա ոչ ոք չուներ, ինչին Ժիրինովսկին պատասխանել է. «Եվ ի՞նչ, սկսենք խղճա՞լ նրան դրա համար: Նա ոչ ոք չունի, և դուք խղճում եք նրան: Շունը նույնպես լքված է, և  խղճում եք: Ամեն ինչ լավ է, սակայն, այնուամենայնիվ, չի կարելի դժբախտությունը գլխավորը դարձնել կյանքում: Այո, մեղք են լքված մարդիկ, շները, իսկ ոմանք սովորում են ինչ-որ կատակոմբներում, և հիմա ի՞նչ, դուք պետք է թողնեք այս լավ դպրոցը և խղճա՞ք նրանց: Պետք է ամեն դեպքում մտածել, որպեսզի նրանց համար էլ լավ լինի»: