Անկախության օրվա հրավառության վրա կծախսվի 10 000 դոլարից ավելի գումար

Սեպտեմբերի 11-ի` կառավարության նիստում որոշվեց, որ ՀՀ անկախության հռչակման 23-րդ տարեդարձին նվիրված տոնական միջոցառման կազմակերպման համար ՀՀ մշակույթի նախարարությանը կտրամադրվի 53 միլիոն դրամ:

Yerkir.am-ը հենց այդ օրն էլ գրավոր հարցումով «Կամերային երաժշտության ազգային կենտրոն» ՊՈԱԿ-ից /այս տարվա միջոցառումների կազմակերպիչն է/ փորձել է պարզել, թե ինչպես է ծախսվելու այդ գումարը:

ՊՈԱԿ-ից մեզ տեղեկացրին, որ գումարն ամբողջովին ծախսվելու է տեխնիկայի, բեմի ձևավորման, հրավառության և այլ նպատակներով, իսկ ելույթ ունեցողներն անվճար են հանդես գալու, բացառությամբ` պարային խմբերի:

Այսպիսով` տոնական համերգի լուսային, ձայնային համակարգի, բեմական սարքավորումների վարձակալության, տեղափոխման, մոնտաժման, սպասարկման, ապամոնտաժման համար ծախսվել է 45. 976.000 դրամ, բեմի ձևավորման և հանդերձասենյակների վարձակալության համար` 1.700.000 դրամ, պարային խմբերին հատկացվել է 1. 800.000 դրամ:

Միայն հրավառության համար նախատեսված է 4,5 մլն դրամ: