Օձունի եկեղեցու հիմնանորոգման աշխատանքները կավարտվեն հոկտեմբերի վերջին

Օձունի Սուրբ Մարիամ Աստվածածին եկեղեցում, շինարարական առումով, գրեթե անելու բան չի մնացել. մասնագետները վերջին աշխատանքներն են իրականացնում: Օձունի եկեղեցու հիմնանորոգման աշխատանքները կավարտվեն նախատեսված ժամանակից շուտ:

Yerkir.am-ի հետ զրույցում աշխատանքները ֆինանսավորող «Հովհաննես Իմաստասեր Կաթողիկոս Օձնեցի» հիմնադրամի տնօրեն Վանուշ Շերմազանյանը հայտնեց, որ եկեղեցին ամբողջությամբ պատրաստ կլինի հոկտեմբերի վերջին:

«1500 տարվա եկեղեցին առաջին անգամ մենք հիմնավոր` իտալացի մասնագետների և հնագետների հետ խորհրդակցելով և նրանց ծառայություններից օգտվելով, վերանորոգեցինք: Հայաստանում մի քանի եկեղեցի է իտալացիների խորհրդատվությամբ վերականգնվում, առաջիններից մեկն Օձունն է, և այդ փորձը կարելի է բարեհաջող համարել»,- ասաց Շերմազանյանը:

Նա տեղեկացրեց նաև, որ եկեղեցու գմբեթին երկրաշարժի հետևանքով 5 ճաք էր առաջացել, հյուսիսարևմտյան պատին ևս երկու մեծ ճաք կար, որոնց վերանորոգումը կատարվել է Միլանի պոլիտեխնիկի դասախոսների խորհրդատվությամբ:  Առայժմ, ցավոք, բաց է մնում վանքի կամարաշարն ու կողքի մահարձան-հուշարձանը վերանորոգելու հարցը:

«Գարնանը պարզ կլինի` կշարունակե՞նք, թե՞ ոչ, քանի որ գումարային որոշ խնդիրներ կան»,- ասաց Շերմազանյանը: