Թուրքիայում հայկական եկեղեցու բարեկարգման աշխատանքները կավարտվեն 2-3 ամսից

Թուրքիայի Էսքիշեհիրի Սիվրիհիսար շրջանում գտնվող հայկական Սուրբ Երրորդություն եկեղեցում բարեկարգման աշխատանքներ են կատարվում, որոնք կավարտվեն 2-3 ամսից. տեղեկացնում է Ermenihaber-ը:

Եկեղեցու տարածքում տեղադրվելու են քանդակագործ Մեթին Յուրդանուրի ստեղծագործությունները:

Սիվրիհիսարի շրջկենտրոնի աշխատակիցները «Ակօս» շաբաթաթերթի հետ զրույցում ասել են, որ ցանկանում են, որ Պոլսի Հայոց պատրիարքության մասնակցությամբ կատարվի բացման արարողությունը: Նրանք հայտնել են, որ  շրջկենտրոնը դրական է վերաբերվում եկեղեցին պաշտամունքային արարողությունների համար բացելուն, սակայն դա քաղաքական կամք է պահանջում:

Եկեղեցին կառուցվել է 1650 թվականին: 1876 թվականի հրդեհից վնասված եկեղեցին վերաբացվել է 1881 թվականին: Եկեղեցու վերակառուցումը սկսվել է 2010 թվականին, երբ Սիվրիհիսարի շրջկենտրոնի սեփականությունը համարվող եկեղեցին հանձնվել է մշակույթի նախարարությանը: