Գագիկ Ծառուկյանի հարցազրույցը ճիշտ շեշտադրումներով էր. Ռուբեն Հակոբյան

ԱԺ «Ժառանգություն» խմբակցության ղեկավար Ռուբեն Հակոբյանը, այսօր լրագրողների հետ ճեպազրույցում անդրադառնալով երեկ ԲՀԿ առաջնորդ Գագիկ Ծառուկյանի հարցազրույցին, կարծիք հայտնեց, որ այն ճիշտ շեշտադրումներով էր, մասնավորապես` խոսքը վերաբերում է քաղաքական հիմնական մոտեցումներին:

«Կիսում եմ ԲՀԿ առաջնորդի այն տեսակետները, որ սահմանադրական փոփոխությունների անհրաժեշտությունը չկա, որ պետությունը գնում է փակուղի: Այլ հարց է, թե ինչպիսի քաղաքականություն պետք է որդեգրել այդ մոտեցումների ժամանակ»,- ասաց Ռուբեն Հակոբյանը:

Yerkir.am-ի այն դիտարկմանը, որ հարցազրույցում Գագիկ Ծառուկյանն անդրադառնալով Սահմանադրական փոփոխություններին բառացիորեն ասել է, որ «լուրջ չի համարում խոսել մի բանի մասին, որը դեռ չկա, հայտնի չէ, պարզ չէ` խոսքը ինչ փոփոխությունների մասին է եւ երբ կլինի փաթեթը, հայեցակարգը, այն ժամանակ էլ պատրաստ կլինի բոլոր հարցերին պատասխանելու, Ռուբեն Հակոբյանն ասաց, որ «տարբերության նյուանսները պետք է ճշտել իրենցից»:

Ինչ վերաբերում է Գագիկ Ծառուկյանի այն դիրքորոշմանը, որ քառյակի ձևւաչափն այնքան էլ չի կարևորում և կարող է անցնել երկկողմ ձևաչափերին, ապա, պատգամավորի կարծիքով, Գագիկ Ծառուկյանը խոսում է հնարավոր տարբերակների մասին:

«Քառյակը միշտ օրակարգային միասնական դարձնում է այն հարցերը, որոնք ընդունվում են բոլորի կողմից: Եթե որևէ կարևոր հարցի հետ կապված, օրինակ` սահմանադրական փոփոխությունների հետ կապված, կան տարաձայնություններ, ուրեմն նորմալ է, որ քաղաքական ուժերը առանձին արտահայտեն իրենց դիրքորոշումները: Դաշնակցությունը վերջնական չի ասել, որ աջակցում է կամ կմիանա սահմանադրական փոփոխություններին, մեր գործընկերներն ասել են, որ իրենք ունեն իրենց մոտեցումները, որոնք քննարկման փուլում են: Կարևորում եմ, որ քառյակը միասնաբար շարունակի իր գործունեությունը, որովհետև քառյակը այն քաղաքական միավորն է, որը կարող է իրավիճակ փոխել առանց մայդանների ու ցնցումների, այսինքն` կարող է ժողովրդին ուղղորդել դեպի արմատական փոփոխություններ»,- ասաց Ռուբեն Հակոբյանը` հավելելով, որ քառյակի ուժերի բոլոր փաստարկներն էլ համոզիչ են` սահմանադրական փոփոխությունների հետ կապված:

Նա նշեց, որ այսօր` ժամը 13-ին, քառյակի ուժերը կրկին կհանդիպեն, սակայն օրակարգը, ինչպես միշտ, հայտնի չէ, որովհետև այն ձևավորվում է հենց տեղում: