Գագիկ Ծառուկյանի տեղը բարեգործությունն է, ոչ թե քաղաքականությունը. Ռուբեն Բաբայան

Սոցիոլոգ Ահարոն Ադիբեկյանի կարծիքով՝ առաջիկա խորհրդարանական ընտրություններին մասնակցելու ռեալ  հնարավորություն ունեն առնվազն տասը քաղաքական ուժեր, որոնցից հինգի հավակնություններն ավելի մեծ են:«Այդ կուսակցություններն են` ՀՀԿ-ն, ՀՅԴ-ն, ԲՀԿ-ն, ՀԱԿ-ը և ՀՎԿ-ն: Դրանց  ներսում կան շատ լուրջ ռեսուրսներ, խարիզմատիկ դեմքեր»,- ասաց նա լրագրողների հետ հանդիպման ժամանակ:

Ադիբեկյանի խոսքով՝ շատ են նաև այնպիսի կուսակցությունները, որոնց հաջողությունը կախված է անհատներից:  «Անհատների շուրջ է շատ հաճախ ձևավորվում կուսակցությունների իմիջը»,- ասաց նա:

ԱԱԾ  պետի նախկին տեղակալ Գուրգեն Եղիազարյանն էլ կարծիք հայտնեց, որ մեր քաղաքական ուժերը, մասնավորապես` «Ծառուկյան դաշինք»-ի շուրջ համախմբվողները, կարող են հասնել հաջողության, բայց «միակ թյուրիմացությունը», ըստ նրա,  ՎՊ-ի նախագահ Իշխան Զաքարյանի  ներկայացվածությունն է ԲՀԿ-ում:

Երևանի տիկնիկային թատրոնի գեղարվեստական ղեկավար Ռուբեն Բաբայանի խոսքով` այս պահին քաղաքական դաշտում ամեն ինչ սահմանափակվում է զուտ կոչերի մակարդակով: «Ես կարծում եմ՝ Գագիկ Ծառուկյանի տեղը բարեգործությունն է, ոչ թե քաղաքականությունը»,- ասաց  նա, ապա նշեց, որ շատ քաղաքական ուժեր էլ մեծ ուշադրությամբ նայում են Գագիկ Ծառուկյանի գրպանին:

«Վարդան Օսկանյանի մասին էլ ասեմ, որ նրանից իր պատգամավորական գործունեության ընթացքում չեմ տեսել որևէ ելույթ կամ առաջարկ, օրենսդրական աշխատանք, չեմ տեսել այդ մարդու աշխատանքը»,- ասաց Բաբայանը:

Անդրադառնալով Սեյրան Օհանյանի գործունեությանը՝ նա ասաց, որ Օհանյանից որևէ կոնկրետ հայտարարություն չի տեսել: