Վերաբացվեց Երևան-Ֆրանկֆուրտ կանոնավոր չվերթը

Սեպտեմբերի 9-ին Ֆրանկֆուրտի միջազգային օդանավակայանում տեղի ունեցավ «Էրբաս–320» ինքնաթիռով Հայաստանից ժամանած ուղևորների դիմավորումը և Երևան–Ֆրանկֆուրտ կանոնավոր չվերթի վերաբացմանը նվիրված հանդիսավոր միջոցառումը։

Ներկա էին Հայ Առաքելական եկեղեցու Գերմանիայի թեմի առաջնորդ արքեպիսկոպոս Բեկչյանը, վարդապետ Սերովբե Իսախանյանը, Ֆրանկֆուրտի միջազգային օդանավակայանի ղեկավարության, Հեսսեն երկրամասի հայ համայնքի և գործարար շրջանակների ներկայացուցիչներ, Գերմանիայում Հայաստանի Հանրապետության դեսպան Վահան Հովհաննիսյանը, փոխդեսպան Աշոտ Սմբատյանը, Հեսսենում ՀՀ պատվո հյուպատոս դոկտոր Բրայան Ֆերան, բազմաթիվ ուղևորներ, անձնակազմի և չվերթն իրականացնող «Air Armenia» ընկերության պատասխանատուներ։

Ողջույնի խոսքում դեսպան Վահան Հովհաննիսյանն անդրադարձավ Գերմանիա–Հայաստան օդային կամրջի կարևորությանը, որն, անշուշտ, նպաստելու է մեր երկրի գիտական, կրթական և մշակութային մերձեցմանը Գերմանիայի և, ընդհանրապես, Եվրամիության հետ։

Նոր չվերթի բացումը լուրջ ակնկալիքներ է առաջ բերում ներդրումների և զբոսաշրջության ոլորտներում։ Ներկայացնելով «Air Armenia» ընկերությունը և նրա ներկայացուցիչներին` դեսպանը հիշեցրեց ընկերության դերակատարությունը «Օգնիր Եղբորդ» քաղաքացիական նախաձեռնության մեջ, երբ «Air Armenia»-ի ակտիվ մասնակցությամբ հաջողվեց սննդամթերք և դեղորայք հասցնել շրջափակված Հալեպի  հայ համայնքի համար։