Պարզ չէ` թիկունքումդ ի՞նչ են անում ադրբեջանցիներին իրենց եղբայրը համարող Եհովայի վկաները

Վերջին շրջանում Եհովայի վկաները հանրապետության տարբեր մասերում ստենդներ են տեղադրել, որոնց միջոցով իրենց գրականությունն են տարածում. լրագրողների հետ հանդիպման ժամանակ հայտնեց «Դիալոգ» ՀԿ-ի նախագահ Ալմաստ Մուրադյանը:

Նա նշեց նաև, որ քաղաքում ստենդներ տեղադրելը հակաօրինական է, քանի որ, օրենքի համաձայն, նրանք գործունեություն կարող են իրականացնել միայն իրենց համար առանձնացված տարածքում, իսկ փողոցում նրանց նման գործունեությունը հանրային քարոզչություն և հոգեորսություն է դիտարկվում:

«Հարցի հետ կապված` դիմել էինք ՀՀ ոստիկանություն, քրեական գործ էր հարուցվել, որը, սակայն, փակվեց` հանցակազմի բացակայության պատճառով: Մենք պահանջում ենք, որ փողոցներից հավաքվեն այդ ստենդները, քանի որ նրանց գրքերը շատ գունազարդ են, և չես կարող ասել, թե ինչ կլինի երեխայի ճակատագիրը, որը պատահականորեն փողոցից մի գունազարդ գրքույկ է վերցրել»,- ասաց Մուրադյանը:

Նա նշեց նաև, որ Եհովայի վկաները շատ երկրներում որպես տոտալիտար աղանդ են գրանցված, սակայն մեզ մոտ այդ բնորոշումը չունեն: Մուրադյանը տեղեկացրեց, որ նրանց գրքույկներում վտանգավոր կոչեր կան, օրինակ` ոչ մի դեպքում արյան փոխներարկում չանել, անգամ` եթե դրա շնորհիվ կարող է մարդու կյանքը փրկվել: «Նրանք մերժում են ազգային հիմնը, դրոշը, կոչեր անում չհարգել դրանք»,- ներկայացրեց բանախոսը:

Ըստ Մուրադյանի` նրանց անօրինական գործունեության դեմ հնարավոր է պայքարել միայն համախմբված գործունեության միջոցով, Երևանի քաղաքապետարանն ու ՀՀ ոստիկանությունն այս դեպքում պետք է հստակ քայլեր ձեռնարկեն:

Yerkir.am-ի հարցին, թե վերոհիշյալ կրոնական կառույցը միայն դրսի՞ց է ֆինանսավորվում, Մուրադյանը պատասխանեց, որ «Եհովայի վկաներ» կազմակերպությունը կրոնի, գաղափարախոսության վրա հիմնված լավ բիզնես մոդել է դարձել ամբողջ աշխարհում. «Նրանք գրականություն են արտադրում և տարածում: Յուրաքանչյուր անդամ պարտավոր է իր հաշվին ձեռք բերել որոշակի քանակությամբ գրականություն և անվճար տարածել, այսինքն` տեղում իրենց բիզնեսն են հիմնում»:

«Ազգային արժեքների պահպանման ճակատ» ՀԿ-ի նախագահ Սևան Աղաջանյանն էլ նշեց, որ արդեն 1 տարի է, ինչ հետևում է Եհովայի վկաների գործունեությանը Հայաստանում և արդեն բավական տվյալներ ունի, որոնք առաջիկայում ամբողջացնելով` հանդես կգան կոնկրետ քայլերով:

«Առաջիկայում պատրաստվում ենք դիմել համապատասխան ատյաններին` պահանջով` փակել այդ կառույցը: Նրանք ազգային անվտանգությանը սպառնացող գործունեություն են ծավալում` խախտելով ՀՀ Սահմանադրությունը և օրենքները: Ավելին` նրանք ադրբեջանցիներին համարում են իրենց եղբայրը, և չես կարող ասել` քո թիկունքում ինչ են անում»,- ասաց Աղաջանյանը` հավելելով, որ եթե Ֆրանսիան փակել է այդ կազմակերպությունը` ազգային անվտանգության նկատառումներով, ի՞նչն է խանգարում նույն բանն անել նաև մեզ մոտ: