Հանուն արվեստի արժե մեռնել. սպառնում են Հայոց ցեղասպանության մասին ֆիլմ նկարահանած թուրք ռեժիսորին

Հայոց ցեղասպանության մասին «Հատում» անունով ֆիլմ նկարահանած` թուրքական ծագումով գերմանացի ռեժիսոր Ֆաթիհ Աքընն ու ֆիլմի դերասանները Վենետիկի 71-րդ կինոփառատոնի ընթացքում մամլո ասուլիս են տվել:

Ըստ Habeler-ի՝ Աքընն ասել է, որ Հայոց ցեղասպանության մասին պատմող ֆիլմերը քիչ են, այդ պատճառով կարևոր է նման ֆիլմերի նկարահանումը:

«Այս ֆիլմի նկարահանումը ինձնից 7 տարի խլեց, և հիմա ես պատրաստ եմ: Միայն կարող եմ ասել, որ սպառնում են ինձ, սակայն հանուն արվեստի արժե մեռնել»,- ասել է Աքընը:

Հարցին, թե ինչպե՞ս է կարողացել Հայոց ցեղասպանությունն ու բնիկ ամերիկացիների դեմ իրագործված ցեղասպանությունը համեմատել, ռեժիսորն ասել է. «Ես լավ գիտակցում եմ, որ ոչ մի թուրք չի կարող մարսել այն ֆիլմը, որի հերոսը հայ է: Այդ իսկ պատճառով, համակրանք ստեղծելու համար, անդրադարձա նաև բնիկ ամերիկացիների ցեղասպանությանը»:

Իսկ ֆիլմում նկարահանված հայ դերասան Սիմոն Աբգարյանը, նշելով, որ սա հայերի համար երկար սպասված ֆիլմ է, ասել է. «Այս ֆիլմը երկար ժամանակ խլեց: Գործի անցնելու համար պետք էր երեք սերունդ անցնել: Առաջին սերունդը ողջ մնալու պայքար մղեց, երկրորդը՝ ապրելու, իսկ երրորդը՝ գործի անցնելու»:

Նշենք, որ Ֆաթիհ Աքընը Համբուրգի կինոփառատոնի շրջանակներում արժանացել է հատուկ մրցանակի: