Յուրաքանչյուր խաղում դուրս եմ գալիս խաղադաշտ՝ գոլ խփելու համար. Միհրան Մանասյան

Արդեն հայտնել ենք, որ Երևանի «Ալաշկերտ»-ն այսօր բաց մարզում է անցկացրել «Նաիրի» մարզադաշտում: Թուրքիայում անցկացրած ուսումնամարզական հավաքի շրջանակներում տեղի ունեցած վերջին խաղում թեթև վնասվածք էր ստացել թիմի գլխավոր ռմբարկու Միհրան Մանասյանը, ով այսօր նստած հետևում էր խաղընկերների մարզմանը: Yerkir.am –ի թղթակիցը զրուցեց ֆուտբոլիստի հետ անցկացրած հավաքի և գալիք մրցաշրջանի վերաբերյալ:

«Ուսումնամարզական հավաքը ծառայեց իր նպատակին: Թիմն արդեն ամբողջությամբ պատրաստ է առաջնությանը: Հավաքի շրջանակներում անցկացրեցինք 2 ընկերական հանդիպում: Երկու թիմերն էլ բավականին ուժեղ կազմ ունեին, սակայն մենք կարողացանք արժանի մրցակցություն ցույց տալ այդ խաղերում»,- նշեց Մանասյանը:

Խոսելով գալիք մրցաշրջանում իր և թիմի մասին՝ ֆուտբոլիստն ասաց. «Թիմի առջև խնդիր է դրված՝ գրավել մրցանակային տեղ, և ամեն ինչ անելու ենք՝ այդ խնդիրը լուծելու համար: Ես յուրաքանչյուր խաղում դուրս եմ գալիս խաղադաշտ՝ գոլ խփելու համար: Թուրքական ակումբի հետ կայացած ընկերական խաղում թեթև վնասվածք ստացա, սակայն մինչ առաջնության մեկնարկը ամբողջությամբ վերականգնված կլինեմ»: