Գարդաբանիում իրար են բախվել 200 ադրբեջանցի և վրացի

Մայիսի 28-ի գիշերը Վրաստանի ադրբեջանաբնակ Գարդաբանի քաղաքի կենտրոնում բախում է տեղի ունեցել ադրբեջանցիների և վրացիների՝ տեղի սվանների միջև: Ըստ ականատեսների՝ կոնֆլիկտը սկսվել է թեյարաններից մեկում, որտեղ մի քանի սվան լեզվակռվի է բռնվել 4 ադրբեջանցու հետ:

Այնուհետև սկսել են գործադրվել մահակներ ու ձեռքի տակ եղած այլ միջոցներ: Փոքր կռիվը հաշված վայրկյանների ընթացքում վերաճել է դաժան բախման, որին մասնակցել է ավելի քան 200 մարդ: Կռվի ընթացքում կողմերը հայհոյել են իրար, հնչեցրել քսենոֆոբ բովանդակության լուտանքներ:

Ադրբեջանցիների և վրացիների միջև զանգվածային կռիվը տևել է մոտ կես ժամ: Այն դադարեցվել է միայն կռվի վայր ժամանած ոստիկանության և հատուկ ծառայության միջամտությունից հետո:

Մայիսի 29-ի առավոտյան Վրաստանի ներքին գործերի նախարարությունը հայտնել է, որ սկսել է միջադեպի հետաքննություն` ըստ Վրաստանի Քրեական օրենսգրքի «խուլիգանության» հոդվածի:

Այս մասին հայտնում է Վրաստանի հայ համայնքի կայքը: Ավելի մանրամասն՝ սկզբնաղբյուր կայքում: