Միկոյանի արձանը չտեղադրելու մասին նոր նախագիծ կներկայացվի Երևանի ավագանուն

Երևանի ավագանու անդամ Դավիթ Սանասարյանը ներկա չի եղել Միկոյանի արձանի տեղադրումը թույլատրող որոշման ընդունման ժամանակ: Սակայն եթե ներկա լիներ, ապա իր կուսակիցների հետ միասին դեմ կքվեարկեր:

ԽՍՀՄ գործիչ Ա. Միկոյանի արձանը Երևանում տեղադրելու վերաբերյալ Մամուլի ազգային ակումբի կողմից կազմակերպված քննարկմանը նա խոսեց ոչ միայն որպես ավագանու անդամ, այլև ստալինյան բռնաճնշումների ժամանակ գնդակահարված մարդու ծոռ:

Սանասարյանն ասաց, որ եթե չկարողանան հասնել նրան, որ արձանը չտեղադրվի, ապա կարվեն քայլեր, որ արձանը տեղադրել նախաձեռնողները ամոթալի վիճակում կհայտնվեն: «Ես դեմ եմ վանդալիզմին, սակայն այդ արձանն այդպես չի մնա, կարմիրով կպատվի»,- ասաց նա:

Դ. Սանասարյանը նշեց նաև, որ ինքն էլ դեռ չի կողմնորոշվել` արձանը պե՞տք է տեղադրվի, թե՞ ոչ: Գուցե այն տեղադրելուց հետո ուսուցիչները սերունդներին կտանեն այնտեղ և ցույց կտան, թե ինչպիսի մարդ չպետք է լինել:

Սակայն Երևանի ավագանու անդամ Անահիտ Բաշխյանը նշեց, որ նույնիսկ դրա համար չարժե արձան տեղադրել: Նա հայտնեց նաև, որ նույն օրը` ապրիլի 30-ին, երբ ընդունվել է այդ աղմկահարույց որոշումը, ընդունվել է նաև մեկ այլ որոշում, որով սահմանվում է քաղաքացիների` քաղաքապետարանի աշխատանքներին մասնակցելու կարգը: Եվ դրա համաձայն` հանրությունը պետք է իրազեկված լինի քաղաքապետարանի գործունեությանը և կարողանա իր դիրքորոշումը հայտնել:

Այսպիսով, քանի որ հասարակությունն արդեն իսկ ծանոթ է, մասնավորապես, Միկոյանի արձանի տեղադրման որոշմանը և իր բողոքն արտահայտում է հնարավոր բոլոր միջոցներով, ապա վաղն ավագանու նիստի ժամանակ «Բարև Երևան» խմբակցության անդամները ներկայացնելու են նոր նախագիծ, որով պետք է չեղյալ համարվի Միկոյանի արձանը տեղադրելուն կողմ որոշումը: «Ետ կանգնելու համար շատ մեծ քաջություն պետք չէ»,- նշեց Ա. Բախշյանը:

Նա պատմեց նաև, որ դեռևս մինչև ապրիլի 30-ի` ավագանու նիստը, ավագանու մշակույթի, կրթության և սոցիալական հարցերի հանձնաժողովի նիստում կողմ է քվեարկել այդ որոշումը ավագանու նիստին ներկայացնելուն, քանի որ չի իմացել Միկոյանի հակահայկական գործունեության մասին: Հայկ Դեմոյանի հայտարարությունից հետո է սկսել փորփրել արխիվները և հիմա էլ ամաչում է, որ նման տեղեկությունների չի տիրապետել: