Եթե Լիսկան մարդ սպանեց ու անպատիժ մնաց, երիտասարդներին ծեծելը նրանց համար ի՞նչ է որ. Արա Բուդաղյան

Անպատիժ մնալը պիտի Լիսկային ու նրա թիմին նոր խայտառակ արարքներ թույլ տալու հնարավորություն տար, ուրիշ կերպ լինել չէր էլ կարող. Yerkir.am-ի հետ զրույցում անդրադառնալով մայիսի 25-ին Սյունիքի նախկին մարզպետ Սուրիկ Խաչատրյանի եղբորորդիների «կազմակերպած» ծեծկռտուքին` ասաց Գորիսի քաղաքապետի նախկին թեկնածու, անցյալ տարի Խաչատրյանի տան մոտ սպանված Ավետիք Բուդաղյանի եղբայրը' Արա Բուդաղյանը:

Նա նշեց, որ եթե ուրիշները փորձում են պատկերացնել, թե ինչ են արել Լիսկայի եղբոր տղաները մայիսի 25-ին, ապա ինքը ոչ թե միայն պատկերացնում, այլ նաեւ զգում է կատարվածի ամբողջ էությունը:

«Հինգ օրից եղբորս մահվան, ավելի ճիշտ' սպանության տարելիցն է: Եթե սպանություն կատարեցին ու անպատիժ մնացին, էլ մարդ ծեծելն իրենց համար ի՞նչ է որ...»,- ասաց Արա Բուդաղյանն ու հավելեց, որ դա Լիսկայի ու նրա հարազատների մշտական ձեռագիրն ու բնույթն է'  ծեծել, սպանել, ահաբեկել:

Անսպասելի ոչինչ, ըստ նրա, չկար Խաչատրյանի եղբոր որդիների արարքում, համենայն դեպս, ինքը համոզված է եղել` քանի որ իր եղբոր սպանությունը, որ բոլորը տեսան, մնաց անպատիժ, ապա հենց այդպես էլ պետք է լիներ, հենց այդպես էլ պետք է իրենց պահեին Լիսկան ու նրա հարազատները, եւ  դեռ ավելի վատ բաներ արժե սպասել նրանցից...