Աղքատության խորացումը կապված է կարկտահարության հետ. մարզպետի բոցը

ԱԺ հանձնաժողովների նիստում, երբ քննարկվում էր 2013թ. բյուջեի կատարողականը, ԱԺ պատգամավոր Նիկոլ Փաշինյանը հարց ուղղեց Արագածոտնի մարզպետ Սարգիս Սահակյանին, թե ինչո՞ւ է Արագածոտնի մարզում գրանցվում աղքատության ամենաբարձր մակարդակը, մանավանդ` երբ մարզպետը հաշվետվության ժամանակ ասում է, որ միջոցներն արդյունավետ են ծախսվում:

Նա նաև հարց ուղղեց Օհանավանի, Կարբիի և այլ գյուղերի բնակիչների բողոքի վերաբերյալ: Այդ գյուղացիները մի քանի անգամ բողոքել են ՀԷԿ-ի կառուցման դեմ, որի պատճառով անգամ փակում էին ճանապարհները: «Այդ գյուղացիները բողոքում էին, որ եթե ՀԷԿ կառուցվի, իրենք ջրից կզրկվեն; Մամուլում կան հրապարակումներ, որ հենց Դուք եք այդ ՀԷԿ-ի սեփականատերը»,- ասաց Նիկոլ Փաշինյանը:

Մարզպետը նախ նշեց, որ աղքատության խորացումը կապված է կարկտահարության հետ: Իսկ Փաշինյանը նշեց, որ կարկտահարությունից այլ մարզեր էլ են տուժել, բայց այնտեղ գրանցվել է աղքատության նվազում, իսկ Արագածոտնում` խորացում:

ՀԷԿ-ի հետ կապված` մարզպետը նշեց, որ ինքը կապ չունի դրա հետ, և որևէ բարձրաստիճան պաշտոնյա էլ կապ չունի ՀԷԿ-ի կառուցման հետ, կառուցողն անհատ քաղաքացի է: Ըստ մարզպետի` գուղացիները կարծում էին, թե ոռոգման ջրից կզրկվեն, եթե կառուցվի այդ ՀԷԿ-ը, և ինքը  թույլ չի տվել, որ այդն կառուցվի:

«ՀԷԿ-ի տիրոջ` անհատ քաղաքացու անունը ավելի գաղտնի եք պահում, քան ՀՀ պետական գաղտնիքները: Ասեք անունը, իմանանք, որ թեման փակվի»,- արձագանքեց Փաշինյանը:

«Անհատ քաղաքացու անուն-ազգանունը կա մամուլում: Ես հիմա չեմ հիշում այդ մարդու անունը, ոչ մի բան գաղտնի չէ: Եթե ցանկանամ ՀԷԿ կառուցել, ամաչելու բան չունեմ, կկառուցեմ, բայց ես դրա հնարավորությունը չունեմ»,- ասաց մարզպետը: